شىعىس قازاقستاندا ءورت ءقاۋپى ماۋسىمى باستالعالى بەرى دالا جانە ورمان ورتتەرى تىركەلدى. ناۋرىز ايىنان بەرى سۋ قويمالارىندا 4 قايعىلى وقيعا ورىن الدى.
شقو تجد قىزمەتكەرلەرى دالا جانە ورمان ورتتەرىنىڭ كوبەيگەنىن اتاپ ءوتتى. ونىڭ الدىن الۋ ماقساتىندا پروفيلاكتيكالىق جۇمىستار جۇرگىزىلۋدە. شىعىس قازاقستاندا قۇرامىندا پوليسيا قىزمەتكەرلەرى مەن جەرگىلىكتى بيلىك وكىلدەرى، ورمانشىلار، سونداي-اق تجد ماماندارى بار 60 ءموبيلدى توپ قۇرىلدى.
– بۇگىنگى كۇنى 40 رەيد جۇرگىزىلىپ، 40-قا جۋىق زاڭبۇزۋشىلىقتار انىقتالدى. سوندىقتان وبلىس تۇرعىندارىن ءورت قاۋىپسىزدىگى ەرەجەلەرىن ساقتاپ، ءبىزدىڭ جۇمىسىمىزعا تۇسىنىستىك تانىتۋلارىن سۇرايمىز. ءقازىر اۋا رايىنا بايلانىستى دالا جانە ورمان ورتتەرى كوبەيدى، – دەدى شقو تجد ءبولىم باسشىسىنىڭ مىندەتىن اتقارۋشى الەكسەي شتىكەل.
شقو تجد ءبولىم باسشىسى تيمۋر ديداحمەتوۆ ناۋرىز ايىنان بەرى سۋ قويمالارىندا 4 قايعىلى وقيعا ورىن العانىن اتاپ ءوتتى. ونىڭ ىشىندە 3 بالىقشى سۋعا باتىپ كەتسە، ءبىر ادام قايىقپەن جۇزەمىن دەپ قايعىلى جاعدايعا دۋشار بولعان. بۇدان بولەك ءبىر ادام ىزدەستىرىلۋدە.
– شقو تجد ماماندارى سۋعا ءتۇسۋ ماۋسىمى باستالاردىڭ الدىندا ءتۇسىندىرۋ جۇمىستارىن جۇرگىزەدى. ال سۋعا ءتۇسۋ ماۋسىمى اشىلعاندا ءبىزدىڭ ماماندار جەرگىلىكتى پوليسيا قىزمەتكەرلەرى مەن كولىكتى باقىلاۋ ينسپەكسياسىمەن بىرگە رەيدتەر جۇرگىزىلەدى. سۋعا تۇسۋگە تىيىم سالىنعان اۋماقتاردا قۇتقارۋشىلار پاترۋلدەيتىن بولادى. الداعى ۋاقىتتا مەكتەپ ديرەكتورلارىمەن جانە لاگەر تالىمگەرلەرىمەن ادىستەمەلىك سەمينارلار ۇيىمداستىرىلادى. ءبىز وبلىس تۇرعىندارىن سۋ قويمالارى ماڭىنداعى قاۋىپسىزدىكتى ساقتاۋعا شاقىرامىز، – دەدى تيمۋر ديداحمەتوۆ.
پىكىر قالدىرۋ