قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى 18 مامىردان باستاپ مەشىتتەر اشىلادى دەپ مالىمدەدى.
– اللا قالاسا، 18 مامىردا جەكە قۇلشىلىق جاساپ، قۇران وقىتىپ، نەكە قيدىرۋعا نيەت بىلدىرگەن ازاماتتار ءۇشىن مەشىتتەرىمىزدى اشامىز. وسى ساتتە كارانتين تالاپتارى قاتاڭ ساقتالۋى ءتيىس. ال ءبىزدىڭ يمامدارىمىز بۇل مەزەتتە كۇشەيتىلگەن رەجيمدە جاماعاتقا قىزمەت كورسەتۋى كەرەك. قۇلشىلىق ءۇيىن 3 ساعات سايىن تازا اۋامەن الماستىرىپ وتىرۋدى، مەشىتكە كەلۋشىلەرگە بەتپەردە مەن قولعاپ كيىپ الۋدى، دارەت العاندا، جەكە قۇلشىلىق جاساعاندا كارانتين تالاپتارىن قاتاڭ قاداعالاۋدى تاپسىرامىن، – دەدى ناۋرىزباي قاجى تاعان ۇلى.
باس ءمۇفتي مەشىتكە كەلۋشىلەردى مىناداي تالاپتاردى ورىنداۋعا شاقىردى:
- مەشىتكە مەديسينالىق ماسكا جانە قولعاپ كيىپ كەلۋ؛
- انتيسەپتىكتى ءجيى قولدانۋ؛
- جەكە قۇلشىلىق جاساۋ كەزىندە 1 جارىم مەتر اراقاشىقتىق ساقتاۋ؛
- قۇران وقيتىن بولمەگە 1 جارىم مەتر اراقاشىقتىق ساقتاپ وتىرىپ، 10 ادامنان ارتىق كىرمەۋ؛
- نەكە قيدىراتىن بولمەگە 4 ادامنان ارتىق كىرمەۋ.
ەسكە سالا كەتەيىك، ورتالىق كوممۋنيكاسيالار قىزمەتىندە وتكەن بريفينگتە باس ءمۇفتي ناۋرىزباي قاجى تاعان ۇلى قاسيەتتى ءقادىر كەشىن ۇيدە وتكىزۋگە شاقىردى.
پىكىر قالدىرۋ