ماڭعىستاۋلىق ەرىكتىلەر كورپۋسى سۋ تاسقىنىنان زارداپ شەككەن تۇركىستاندىقتارعا 5 تونناعا جۋىق گۋمانيتارلىق كومەك جينادى.

بۇل  تۋرالى قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىستىق جاستار رەسۋرستىق ورتالىعىنىڭ باسشىسى ابىلاي فازىلبەك مالىمدەدى.

تۇركىستان وبلىسىندا ورىن العان توتەنشە جاعدايدىڭ العاشقى كۇنىندە ماڭعىستاۋ وبلىسىنداعى بارلىق جاستار رەسۋرستىق ورتالىقتارى بازاسىندا گۋمانيتارلىق جۇك جيناۋ شتابى قۇرىلدى. ناتيجەسىندە وڭىردەگى ۆولونتەرلار كورپۋسىنىڭ كومەگىمەن 5 تونناعا جۋىق گۋمانيتارلىق كومەك جينالدى. ونىڭ 2 تونناسى وبلىستىق شتابتا، 3 توننا اۋداندىق شتابتا جينالدى.

سونىمەن بىرگە ءوڭىرىمىزدىڭ ءىرى ساۋدا ورىندارىنىڭ الدىنان جۇك كولىك جۇرگىزۋشىلەرىنىڭ باستاماسىمەن، كاسىپكەرلەردىڭ كومەگىمەن جيناۋ پۋنكتەرى جۇمىس جاسادى. ناتيجەسىندە ەل ازاماتتارى مەن قالا تۇرعىندارىنىڭ كومەگىمەن 77،5 توننا گۋمانيتارلىق جۇك جينالدى. اتالعان گۋمانيتارلىق جۇكتى سۇرىپتاۋ جۇمىسىنا وبلىستىق ۆولونتەرلار كورپۋسىنىڭ ۆولونتەرلارى جۇمىلدىرىلدى.

سونىمەن قاتار، ۆولونتەرلار كورپۋسىنىڭ باستاماسىمەن وبلىس تۇرعىندارىن يگى ىسكە جۇمىلدىرۋ ماقساتىندا الەۋمەتتىك جەلىدە اقپاراتتىق جۇمىس جۇرگىزىلدى. ينفوگرافيكالار جاساقتالىپ، ونلاين تولەم جاساۋ جولدارى ءتۇسىندىرىلدى.

-«ءبىر جاعادان باس، ءبىر جەڭنەن قول شىعارىپ»، وسىنداي توتەنشە ۋاقىت كەزىندە اۋىزبىرشىلىك تانىتىپ، قولداۋ بىلدىرگەن بارشا وبلىس تۇرعىندارىنا، جۇك كولىك جۇرگىزۋشىلەرىنە، كاسىپكەرلەرگە، جاستار مەن ۆولونتەرلارعا ءوز العىسىمىزدى بىلدىرەمىز»، دەيدى ابىلاي فازىلبەك.