ءال-فارابي اتىنداعى قازاق ۇلتتىق ۋنيۆەرسيتەتىنىڭ جانىنداعى ءال-فارابي ورتالىعى "ءال-فارابي مۇراسى" اتتى حالىقارالىق ونلاين كونفەرەنسيا ءوتتى.
كونفەرەنسيا ەلىمىزدە اتالىپ ءوتىپ جاتقان شىعىستىڭ عۇلاما ويشىلى، ماتەماتيك، مۋزىكا تەورەتيگى ءابۋ ناسىر ءال-فارابيدىڭ 1150 جىلدىق مەرەيتويىنا ارنالعان مادەني جانە عىلىمي ءىس-شارالار اياسىندا ۇيىمداستىرىلىپ وتىر.
كونفەرەنسيا جۇمىسىندا قازاقستاندىق قوعامنىڭ رۋحاني دامۋى مەن قازىرگى زامانعى سىن-قاتەرلەر كونتەكستىندە ءال-فارابي ينتەللەكتۋالدىق مۇراسىن زەرتتەۋدىڭ وزەكتى ماسەلەلەرى تالقىلانادى. عالىمنىڭ ەڭبەكتەرىنە الەمنىڭ تۇكپىر-تۇكپىرىنەن قىزىعۋشىلىق تانىتاتىنداردىڭ دا سانى ارتىپ كەلە جاتقانى دا حالىقارالىق دەڭگەيدە ولاردىڭ باسىن قوسىپ، پىكىر الماسۋعا مۇمكىندىك جاساۋ قاجەتتىلىگى تۋىنداپ وتىرعانىن بايقاتادى. شەتەلدىك جوعارى وقۋ ورىندارى مەن عىلىمي زەرتتەۋ مەكەمەلەرى جانە عالىمدارى تاراپىنان ءال-فارابيدىڭ شىعارماشىلىق مۇراسىن زاماناۋي قىرىنان زەرتتەۋگە قاتىستى قىزىعۋشىلىقتارى ونىڭ ايقىن دالەلى بولا الادى.
حالىقارالىق ونلاين كونفەرەنسيا جۇمىسىنا قازاقستاننان، جانە الىس-جاقىن شەتەلدەردەن فارابيتانۋ سالاسىنداعى عالىمدار مەن جاس زەرتتەۋشىلەر قاتىستى.
حالىقارالىق ونلاين كونفەرەنسيا ۇلى ويشىل، فيلوسوف-عالىم ءابۋ ناسىر ءال-فارابي بابامىزدىڭ يدەيالارىن ناسيحاتتاۋعا، زاماناۋي قازاقستان قوعامىنىڭ رۋحاني-ادامگەرشىلىك جانە ينتەللەكتۋالدى مادەنيەتىن دامىتۋعا، ويشىل مۇرالارىن ەلىمىزدە جانە الىس‐جاقىن شەت ەلدەردە تانىتۋعا باعىتتالعان.
قاتىسۋشىلار عالىمنىڭ بۇگىنگە دەيىن قازاق تىلىنە اۋدارىلماعان ەڭبەكتەرىن ەلىمىزدىڭ عىلىمي اينالىمىنا كىرگىزۋ جانە سول ءىس اياسىنداعى تۇيتكىلدى ماسەلەلەردى تالقىلاماق. سونىمەن قاتار، بۇگىنگە دەيىن اۋدارىلعان ەڭبەكتەرىن تۇپنۇسقامەن سالىستىرا وتىرىپ قايتا قاراستىرۋ ماسەلەسى دە اۋدارما ىسىنە قاتىستى وزەكتى بولىپ تۇرعان ىستەردىڭ قاتارىندا.
ءال-فارابي ورتالىعىنىڭ 2020 جىلى جاڭاداڭ حالىقارالىق دەڭگەيدە جۇمىس جاسايتىن ورتالىق بولىپ قالىپتاسقانىنان بەرى جانە دە ءال-فارابي اتىنداعى قازاق ۇلتتىق ۋنيۆەرسيتەتىنىڭ عۇلامانىڭ ەڭبەكتەرىنە قاتىستى جاڭا ۇستانىمى، ءفارابيدىڭ ۇلى ويشىل ەكەندىگىن ايتا بەرگەننەن گورى ونىڭ يدەيالارىن ىزگى قوعام قۇرۋ جولىندا زاماناۋي قازاق قوعامىنا سايكەس زەرتتەۋلەر مەن تۇجىرىمدار قالىپتاستىرىپ ناقتى شارالار قولعا الۋ بولىپ تابىلادى.
اتالمىش كونفەرەنسيادا وسى جانە فارابيتانۋ سالاسىنا قاتىستى باسقا دا وزەكتى ماسەلەلەر تالقىلاندى.
پىكىر قالدىرۋ