ماڭعىستاۋدا قۇلشىلىق ەتەتىن ورىندار (مەشىتتەر، شىركەۋلەر) 25 مامىردان باستاپ ارنايى سانيتارلىق تالاپتاردى ساقتاي وتىرىپ اشىلادى. 

بۇل تۋرالى قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىستىق ءدىن ىستەرى باسقارماسىنىڭ باسشىسى ماقساتبەك ماحانبەتوۆ مالىمدەدى.

وزدەرىڭىزگە ءمالىم، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزبايقاجى تاعان ۇلى قازاقستانداعى بارشا مۇسىلمان قاۋىمعا ۇندەۋ جاساپ، 2020 جىلعى 18 مامىردان باستاپ ەلىمىزدەگى بارلىق مەشىتتەردىڭ اشىلاتىنى تۋرالى حابارلادى.

          -الايدا، بۇل رۇقسات ەتىلگەن شارالار تەك توتەنشە جاعدايمەن قاتار، كارانتين ءتارتىبى دە الىنعان وڭىرلەرگە بايلانىستى ەكەنىن نازارلارىڭىزعا سالعىم كەلەدى، - دەيدى ماقساتبەك ماحانبەتوۆ.

          قازاقستان رەسپۋبليكاسىندا توتەنشە جاعداي رەجيمى الىنىپ تاستالعانىمەن، كەيبىر ايماقتاردا ەپيدەميولوگيالىق جاعداي ءالى دە تۇراقتى ەمەس، ونىڭ ىشىندە ماڭعىستاۋ وبلىسىندا دەرتتىڭ تارالۋى باسەڭدەمەي وتىر. سول سەبەپتى، وبلىستا كارانتين ءتارتىبى 25 مامىرعا دەيىن سوزىلدى.

          سوندىقتان، وڭىردەگى ەپيدەميولوگيالىق جاعدايدى ەسكەرە وتىرىپ، ماڭعىستاۋ وبلىسىندا توپ بولىپ قۇلشىلىق ەتەتىن ورىنداردى (مەشىتتەر، شىركەۋلەر) اشۋعا ءالى ەرتە.

وكىنىشكە قاراي، بيىل 25-مامىرعا دەيىن وبلىسىمىزدىڭ بارلىق مەشىتتەرىندە ورازا ايت نامازى، جۇما نامازى جانە تاراۋيق نامازى وقىلمايدى. قاسيەتتى رامازان ايىندا كەلەتىن ءقادىر تۇنىندە مەشىت جابىق بولۋىنا بايلانىستى يمامدار بيىل الەۋمەتتىك جەلىلەردە تىكەلەي ەفيردە وزدەرىنىڭ ۇگىت-ناسيحات جۇمىستارىن جۇرگىزىپ، ۋاعىزدارىن ايتاتىن بولادى، - دەيدى اقتاۋ قالالىق بەكەت اتا مەشىتىنىڭ باس يمامى قايرات مامانبايەۆ.

          ەگەر جاعداي تۇراقتالسا، 2020 جىلدىڭ 25 مامىرىنان باستاپ وبلىستاعى بارلىق قۇلشىلىق ەتەتىن ورىنداردى (مەشىتتەر، شىركەۋلەر) ارنايى سانيتارلىق تالاپتاردى ساقتاي وتىرىپ اشىلاتىن بولادى.