اقتوبەدە بەلسەندى سەرىك ورازوۆ 15 مامىر كۇنى ءوزى تۇراتىن كوپ قاباتتى ءۇيدىڭ اۋلاسىندا پوليسيا قىزمەتكەرىمەن سوزگە كەلىپ، جۇلقىسقان سوڭ ءبىراز ۋاقىتتان كەيىن قايتىس بولدى. بۇل تۋرالى بەلسەندىنىڭ تۋىسى مارات تاڭبايەۆ ايتتى، دەپ جازادى ازاتتىق. اقتوبە وبلىستىق پوليسيا دەپارتامەنتى بەلسەندى قازاسىن راستاعان. 

سەرىك ورازوۆتىڭ قىزى بايان ورازوۆا "ءۇيىمىزدى ۇنەمى پوليسيا تورۋىلداپ جۇرەتىن. بۇگىن (15 مامىر – رەد.) پوليسيا ساعات 10.30 شاماسىندا جەكە شارۋاسىمەن شىعىپ بارا جاتقان اكەمدى توقتاتىپ، ءتۇرلى ساۋال قويعان. اۋلادان شىعارماعان. اكەمنىڭ "وسى سەندەردىڭ مەندە نەلەرىڭ بار؟ جىبەرىڭدەر، جونىممەن كەتىپ بارا جاتقان اداممىن!" دەپ اشۋلانىپ تۇرعان ءساتى اۋلاداعى كامەراعا ءتۇسىپ قالعان" دەدى.

قىزىنىڭ سوزىنشە، اكەسىن پوليسيا قىزمەتكەرىنىڭ جۇلقىلاپ جاتقانىن كورىپ، كوپ قاباتتى ءۇيدىڭ اۋلاسىنا كەلىنى مەن ۇلى جۇگىرە شىققان. بايان ورازوۆا اكەسى سول جەردە قىسىلىپ قالىپ، تۋىستارى ونى پاتەرىنە الىپ كىرگەنىن ايتادى.

ال تۋىسقان ءىنىسى مارات تاڭبايەۆتىڭ سوزىنشە، سەرىك ورازوۆ ۇيگە كىرگەن سوڭ ءبىراز ۋاقىتتان كەيىن جان تاپسىرعان.

- جەدەل جاردەم اعاما كومەكتەسە المادى. اعامنىڭ سۇيەگىنە ءقازىر ساراپتاما جاسالىپ جاتىر. نەدەن قايتقانى ەرتەڭ، 16 مامىردا بەلگىلى بولادى. قالاي بولعاندا دا ۇيدەن ساپ-ساۋ كۇيى شىققان ادامنىڭ ولىمىنە پوليسيا سەبەپكەر بولدى دەپ ويلايمىن، - دەيدى مارات تاڭبايەۆ.

اقتوبە وبلىستىق پوليسيا دەپارتامەنتىنىڭ باسپا ءسوز قىزمەتى سەرىك ورازوۆتىڭ قازاسىنان حاباردار ەكەنىن مالىمدەدى جانە بۇل وقيعا بويىنشا قىلمىستىق كودەكستىڭ 362-بابى 1-بولىگى بويىنشا ("بيلىكتى نەمەسە لاۋازىمدىق وكىلەتىن اسىرا پايدالانۋ") سوتقا دەيىنگى تەرگەۋ باستالعانىن حابارلادى. پوليسيا دەپارتامەنتى سوتقا دەيىن تەرگەۋ ناقتى كىمنىڭ ۇستىنەن باستالعانىن ايتپادى، تەك "وقيعانىڭ جاي-جاپسارى قىلمىستىق تەرگەۋ بارىسىندا تەكسەرىلەتىنىن" جەتكىزدى.

اقتوبەلىك بەلسەندى سەرىك ورازوۆ ماۋسىم ايىندا 69 جاسقا تولار ەدى. ول 2016 جىلى جەردى شەتەلدىكتەردى جالعا بەرۋ زاڭ جوباسىنا قارسى وتكەن جەر ميتينگىسىنە، 2019 جىلى قازاقستانداعى جۇڭگو جوبالارىنا قارسى ميتينگىگە، قۇقىق قورعاۋشىلار ساياسي تۇتقىن دەپ تانىعانداردى بوساتۋدى تالاپ ەتكەن شارالارعا، بيلىككە تالاپ ايتقان بەيبىت ميتينگىلەرگە قاتىسىپ، كوزگە تۇسكەن. بىرنەشە رەت الدىن الا جوسپارلانعان بەيبىت ميتينگىلەر الدىندا پوليسيا ورازوۆتى ۇستاپ، بولىمشەگە اپارعان.