اقتوبەدە جاقىندارى مەن جاقتاستارى بەلسەندى سەرىك ورازوۆتى اقتىق ساپارعا شىعارىپ سالدى، دەپ Qamshy.kz اقپارات اگەنتتىگى ازاتتىق دەرەگىن نەگىزگە الىپ حابارلايدى.

بەلسەندى 15 مامىر كۇنى ءۇيىنىڭ اۋلاسىندا پوليسيا قىزمەتكەرىمەن سوزگە كەلگەننەن كەيىن جۇرەك تۇسىن ۇستاي قۇلاپ، قايتىس بولعان بولاتىن.

مارقۇمنىڭ ۇلكەن قىزى بايان ورازوۆا سۇيەككە سوت-مەديسينا ساراپتاماسى جاسالعانىن ايتادى. بايان ورازوۆا ازاتتىققا كورسەتكەن ساراپتاما قورتىندىسىندا «سەرىك ورازوۆ جۇرەك-قانتامىر جەتىسپەۋشىلىگىنەن قايتىس بولدى» دەپ جازىلعان.

– ۇيدەن ساپ-ساۋ كۇيى شىعىپ كەتكەن ادامنىڭ ولىمىنە پوليسيا قىزمەتكەرى سەبەپكەر بولدى. اكەسىندەي ادامدى جۇلقىلاپ، دورەكىلىك كورسەتكەن ينسپەكتوردىڭ ۇستىنەن سوتقا شاعىمدانباقشىمىز. اكەم ءومىر بويى مۇناي وندىرىسىندە قارا جۇمىس ىستەگەن، ەڭبەكقور ءارى ادال ادام ەدى. ءوزى جەتىمدىك پەن جوقشىلىقتى كوپ كورگەسىن قوعامداعى ادىلەتسىزدىككە جانى توزبەيتىن، – دەيدى بايان ورازوۆا.

19 مامىردا 69 جاسقا تولاتىن سەرىك ورازوۆتىڭ جانازاسىنا اقتوبەلىك بەلسەندىلەر دە كوپ جينالدى. كەۋدە تۇسىنا كوك لەنتا تاققان ولار جانازادان كەيىنگى شاعىن ميتينگىدە «بيلىك بەلسەندىلەردى قۋدالاماسىن» دەپ تالاپ قويدى.

– سەرىك ورازوۆ ۇنەمى پوليسيانىڭ اڭدۋىندا بولدى. سەرىكتىڭ ءوزى مۇنى اقتوبەنىڭ بۇرىنعى اكىمى ماۆر ءابدۋلليننىڭ ەسەپ بەرۋ جيىنىندا دا ايتقان. قالا اكىمى سول جيىندا سەرىكتى «نەمەرە باعىپ ۇيدە وتىرىڭىز، جاستارعا ۇلگى بولىڭىز» دەپ «تاربيەلەمەك» بولدى. ۇيات ەمەس پە؟ ءسوز جوق! ادام ەمەس، فاشيست بولىپ كەتتى عوي بۇل پوليسيا، – دەدى اشىنعان بەلسەندىلەردىڭ ءبىرى گۇلنار بەكەشوۆا.

ءوزىن كابيرا مۇحامبەتوۆا دەپ تانىستىرعان ايەل قازاقستان پرەزيدەنتى توقايەۆقا ۇندەۋ جولداپ، «ءوز جەرىمىزدە تەپىرىش كورىپ ءجۇرمىز، بيلىك بەلسەندىلەردى قۋدالاۋدى توقتاسىن» دەدى.

مارقۇمنىڭ تۋىستارى قازاعا كوڭىل ايتىپ، سەرىك ورازوۆتىڭ وتباسىنا اقتوبە وبلىستىق پوليسيا دەپارتامەنتىنىڭ باسشىسى ارىستان اتىعايدىڭ كەلىپ كەتكەنىن ايتادى.

اقتوبە وبلىستىق پوليسيا دەپارتامەنتىنىڭ باسپا ءسوز قىزمەتى بۇل دەرەك بويىنشا قىلمىستىق كودەكستىڭ 362-بابى 1-بولىگىمەن ("بيلىكتى نەمەسە لاۋازىمدىق وكىلەتىن اسىرا پايدالانۋ") سوتقا دەيىنگى تەرگەۋ باستالعانىن حابارلادى. پوليسيا دەپارتامەنتى سوتقا دەيىن تەرگەۋ ناقتى كىمنىڭ ۇستىنەن باستالعانىن ايتپادى، تەك "وقيعانىڭ جاي-جاپسارى قىلمىستىق تەرگەۋ بارىسىندا تەكسەرىلەتىنىن" جەتكىزدى.

اقتوبەلىك بەلسەندى سەرىك ورازوۆ 19 مامىردا 69 جاسقا تولاتىن ەدى. ول 2016 جىلى جەردى شەتەلدىكتەردى جالعا بەرۋ زاڭ جوباسىنا قارسى وتكەن جەر ميتينگىنە، 2019 جىلى قازاقستانداعى جۇڭگو جوبالارىنا قارسى ميتينگىگە، قۇقىق قورعاۋشىلار ساياسي تۇتقىن دەپ تانىعانداردى بوساتۋدى تالاپ ەتكەن شارالارعا، بيلىككە تالاپ ايتقان بەيبىت ميتينگىلەرگە قاتىسىپ، كوزگە تۇسكەن. بىرنەشە رەت الدىن الا جوسپارلانعان بەيبىت ميتينگىلەر الدىندا پوليسيا ورازوۆتى ۇستاپ، بولىمشەگە اپارعان.