ۇكىمەت COVID-19 ينفەكسياسىنا پسر ادىسىمەن اناليز الۋعا 5،4 ملرد تەڭگە قارجى ءبولدى. ءبىر تەستىڭ باعاسى شامامەن 11،5 مىڭ تەڭگە تۇرادى. وسى رەتتە الەۋمەتتىك مەديسينالىق ساقتاندىرۋ قورى الماتى قالالىق فيليالى تەستتەن تەگىن نەزدە كىمدەر وتە الاتىنىن حابارلادى.
فيليال مالىمەتىنشە، زەرتتەۋگە بولىنگەن قاراجاتتىڭ 1،7 ملرد تەڭگەسى ستاسيونارلارعا، 3،7 ملرد تەڭگەسى – كونسۋلتاتيۆتىك-دياگنوستيكالىق كومەك كورسەتەتىن ەمحانالارعا بەرىلمەك. پاسيەنتتەر اتالعان ەمدەۋ مەكەمەلەرىندە تەستى تەگىن تاپسىرا الادى. تەكسەرۋدەن تەگىن وتەتىن ساناتتار:
- COVID-19 ينفەكسياسىن جۇقتىرعان بولۋى مۇمكىن دەگەن كۇدىكپەن پروۆيزورلىق ستاسيونارعا جاتقىزىلعان پاسيەنتتەر؛
- وتكىر رەسپيراتورلىق جۇقپالى اۋرۋ مەن پنيەۆمونيا بەلگىلەرى انىقتالعان ازاماتتار؛
- كوروناۆيرۋس جۇقتىرعاندارمەن جاقىن بايلانىستا بولعاندار؛
- جوسپارلى تۇردە ستاسيونارعا جاتىپ ەمدەلەتىن پاسيەنتتەر؛
- تىنىس جولدارى، ەندوكريندىك جانە جۇرەك-قان تامىرى جۇيەلەرى اۋرۋىنا بايلانىستى ديناميكالىق باقىلاۋعا الىنعان، جاسى 50-دەن اسقان پاسيەنتتەر؛
- شەتەلدەن كەلگەندەر؛
- ءىىم-نىڭ جۇقپالى اۋرۋدىڭ الدىن الۋعا جۇمىلدىرىلعان قىزمەتكەرلەرى؛
- جۇكتى ايەلدەر جانە ت.ب.
حابارلاماعا سۇيەنسەك، ءقازىر «ۇلتتىق ساراپتاما ورتالىعى» ۇيدە كارانتيندە وتىرعانداردى؛ ارنايى كونتيگەنت (اۋرۋ جۇقتىرۋ ءقاۋپى جوعارى جانە رەسپيراتورلىق سىرقات بەلگىلەرى بار مەديسينا قىزمەتكەرلەرى، ەپيدەمياعا قارسى ءىس-شارالارعا جۇمىلدىرىلعان مەملەكەتتىك ورگانداردىڭ قىزمەتكەرلەرى، قارتتار ءۇيى، ينتەرنات پەن وزگە دە ارنايى مەكەمەلەردىڭ تۇرعىندارى) پەن اسكەرگە شاقىرىلعان ازاماتتاردى پسر-تەكسەرۋدەن وتكىزىپ جاتىر. تەست ورتالىق قاراجاتى ەسەبىنەن تەگىن جاسالادى.
«ايماقتارعا بەرىلەتىن تەست سانىن جەرگىلىكتى اتقارۋ ورگاندارى انىقتايدى. قازىرگى تاڭدا 600-دەن استام مەديسينا ۇيىمىمەن COVID-19 ۆيرۋسىنا قاتىستى زەرتتەۋ جۇمىسىنا قاتىسۋ تۋرالى كەلىسىم بەكىتىلگەن» دەلىنگەن حابارلامادا.
كوروناۆيرۋستىڭ تارالۋىنا جول بەرمەۋ شارالارىنا رەسپۋبليكا بيۋدجەتىنەن 55،9 ملرد تەڭگە بولىنگەن. قارجىنىڭ وپەراتورى – مەديسينالىق ساقتاندىرۋ قورى. ونىڭ 14،7 ملرد تەڭگەسى – ينفەكسيالىق، پروۆيزورلىق جانە كارانتيندىك ستاسيونارلاردا جاتقان پاسيەنتتەردى ەمدەۋگە، 35،8 ملرد تەڭگەسى – ۆيرۋستىڭ تارالۋىنا قارسى ءىس-شارالارعا جۇمىلدىرىلعان مەديسينا قىزمەتكەرلەرىنىڭ جالاقىسىنا ۇستەماقى تولەۋگە، 5،4 ملرد تيەڭگەسى – دياگنوستيكالىق زەرتتەۋلەرگە (پسر-تەست) جۇمسالدى.
پىكىر قالدىرۋ