ءبىلىم جانە عىلىم مينيسترلىگى اسحات ايماعامبەتوۆ بيىلعى مەكتەپ، جوعارى وقۋ ورىندارىنىڭ تۇلەكتەرىن، ولاردىڭ اتا-انالارىن وقۋ جىلىنىڭ اياقتالۋىمەن قۇتتىقتاپ، ساتتىلىك تىلەدى.
قىمباتتى وقۋشىلار، قۇرمەتتى ارىپتەستەر، ارداقتى اتا-انالار مەن تۇلەكتەر!
بارلىعىمىز ءۇشىن بيىلعى 25 مامىر ەرەكشە فورماتتا ءوتىپ جاتىر.
الەمدىك پاندەميا ءبىزدىڭ كۇندەلىكتى ءومىرىمىزدى تۇبەگەيلى وزگەرتتى.
بيىلعى وقۋ جىلى 4 ميلليوننان استام وقۋشى مەن ستۋدەنتتىڭ ەسىندە قاشىقتان وقىتۋ فورماتىنا كوشۋمەن ساقتالادى.
قىسقا ۋاقىتتىڭ ىشىندە بارلىعىڭىز جۇمىستى دۇرىس ۇيىمداستىرا بىلدىڭىزدەر. بۇل – مۇعالىمدەردىڭ، اتا-انالاردىڭ، وقۋشىلاردىڭ بىرلەسكەن ارەكەتىنىڭ ناتيجەسى دەپ بىلەمىن.
بۇگىن مەن ءارقايسىڭىزعا جەكە-جەكە ۇندەۋ تاستاعىم كەلىپ وتىر. سىزدەر جاڭا جاعدايدا جاقسى ناتيجەلەرگە قول جەتكىزىپ، ەرلىك تانىتتىڭىزدار.
ۇستازدارعا دەگەن العىسىمدى ءبىر سوزبەن جەتكىزۋ مۇمكىن ەمەس. سىزدەر قيىن جاعدايعا قاراماستان، وقۋشىلاردى ءبىلىم نارىمەن سۋسىنداتىپ، وقىتۋ بارىسىندا تىنىمسىز ەڭبەك ەتتىڭىزدەر.
سىزدەردىڭ ارقالارىڭىزدا ءتورتىنشى توقسان تولىقتاي قاشىقتان وقىتۋ فورماتىندا ءوتتى، بۇل – ءبىلىم سالاسىندا بۇرىن-سوڭدى بولماعان وقيعا.
قيىن كەزدە بالالارىنا تىرەۋ بولا بىلگەن اتا-انالاردىڭ دا ەڭبەگى ولشەۋسىز.
سىزدەردىڭ قولداۋلارىڭىز، بالالارىڭىزعا ۇيدە وتىرىپ ءبىلىم الۋعا جاعداي جاساۋلارىڭىز قاشىقتان وقىتۋدى ۇيىمداستىرۋعا مۇمكىندىك بەردى.
ءيا، سىن كوپ ايتىلدى، دەگەنمەن سىزدەر تۇسىنىستىك تانىتىپ، جەڭىل قابىلدادىڭىزدار. سول ءۇشىن سىزدەرگە العىس ايتامىن.
وقۋشىلارعا دەگەن ريزاشىلىعىم شەكسىز. ولار جاۋاپكەرشىلىكتى اتا-انالارىمەن تەڭدەي ءبولىسىپ، ءتارتىپتى جانە العىر بولا ءبىلدى. ەندى، مىنە، بىلىمگە دەگەن قۇشتارلىقتى جوعالتپاي، وقۋ جىلىن ويداعىداي اياقتاپ جاتىر. بۇل – شىن مانىندە ەرەسەك ادامدارعا ءتان قاسيەت.
2020 جىلدىڭ تۇلەكتەرىنە جەكە توقتالعىم كەلەدى.
قۇرمەتتى مەكتەپ بىتىرۋشىلەرى، كوللەدج بەن ۋنيۆەرسيتەت تۇلەكتەرى! اركىم بولاشاعىنىڭ جارقىن بولعانىن ارماندايدى. سىزدەر مىقتى عالىم، تابىستى كاسىپكەر عانا ەمەس، ادامگەرشىلىگى مول، جاقسى ادام، بيىك تۇلعا بولاتىندارىڭىزعا سەنىمدىمىن.
تاۋەكەلگە بارۋ ارقىلى عانا اركىم ءوزى ارمانداعان ماماندىقتىڭ يەسى بولا الادى. ەڭ باستىسى، مۇمكىندىكتەردى پايدالانا ءبىلۋ كەرەك. ەش قورىقپاڭىزدار.
العان بەتتەن قايتپاۋ – وتە ماڭىزدى ەكەنىن بىلەمىن. ناقتى قادام جاساپ، ويىڭىزداعىنى ىسكە اسىرۋ قاجەت. ماسەلەن، مەن مەكتەپ بىتىرگەن سوڭ بىردەن گرانتقا تۇسە المادىم. ودان ۇيالۋدىڭ قاجەتى جوق. مەنىڭ الدىمدا ەكى تاڭداۋ تۇردى: ءبىرىنشىسى – اقىلى تۇردە وقۋ، ەكىنشىسى – ءبىر جىل دايىندالىپ، كەيىن ۇلتتىق ءبىرىڭعاي تەستىلەۋدى قايتا تاپسىرۋ. سول كەزدە ءبىر جىل دايىندالىپ، تەستتى قايتا تاپسىرامىن دەپ شەشتىم. ءبىر جىل ۋاقىتىمدى تاباندى دايىندىق پەن جۇمىسقا ارنادىم. ناتيجەسىندە كەلەسى جىلى ارمانداعان گرانتقا قول جەتكىزدىم.
جاقىندا باسىم كوپشىلىگىڭىز ۇبت تاپسىراسىزدار.
تەستىلەۋدەن قورقۋدىڭ قاجەتى جوق، بۇل جاي عانا سىناق، ونىڭ ۇستىنە بۇل ومىرلەرىڭىزدەگى ەڭ جەڭىل ەمتيحاننىڭ ءبىرى بولماق.
اينالاداعى ادامدار قولدارىڭنان ەشتەڭە كەلمەيدى دەسە دە، تاباندىلىق پەن سابىرلىق، كۇندەلىكتى قاجىرلى ەڭبەك پەن العا قويعان ماقساتتارىڭىز بەلگىلى ءبىر ناتيجە اكەلەتىنىن ەستەن شىعارماڭىزدار.
ناتيجە ءوز بەتىمەن كەلمەيدى، ول قاتەلىكپەن قاتار جۇرەدى. كىشكەنتاي كەزىمىزدەن ءبىزدى قاتەلىك جاساۋ دۇرىس ەمەس، كەشىرىمسىز دەپ سەندىرگەن. مەكتەپ قابىرعاسىنان باستاپ قاتەلىك جاساماۋ – ءبىزدىڭ سانامىزعا قۇيىلىپ كەلدى. تابىستى ادام ەشقاشان قاتەلەسپەيدى دەگەن قاتە ۇعىم قالىپتاستى. الايدا ءبارى قاتەلىك جاسايدى، ەڭ باستىسى – ودان ساباق الىپ، تاجىريبە جيناقتاي ءبىلۋ قاجەت. قاتەلىك جاساپ، ءبارىن قايتا باستاۋدان قورىقپاۋ كەرەك.
قىمباتتى جاس تۇلەك!
سىزدەر قازاقستاننىڭ تاريحىندا عانا ەمەس، الەم تاريحىنداعى ەرەكشە تۇلەكسىزدەر!
سىزدەر جاقسى تاجىريبە جيناقتاپ، وي ءتۇيىپ، الەمدى جاقسارتۋعا ۇلەس قوساسىزدار دەپ سەنەمىن.
ەلگە پايداسى تيەتىن جاڭالىق اشىپ، تولاعاي تابىسقا جەتەسىزدەر دەپ ۇمىتتەنەمىن. سىزدەر تاماشا كەزەڭدە ءومىر ءسۇرىپ جاتىرسىزدار، ويتكەنى قازىرگى كەزەڭ – ارماندايتىن، باتىل شەشىمدەر قابىلدايتىن ۋاقىت.
بەلگىسىزدىك پەن وزگەرىستەردىڭ ۋاقىتىندا سىزدەردىڭ باستى قۇندىلىقتارىڭىز ادالدىق، ادىلدىك، ماحاببات، قاراپايىمدىلىق پەن باتىلدىق بولۋى كەرەك.
ساتتىلىك سەرىك بولسىن!
ارماندارىڭىزعا قول جەتكىزىپ، ءومىر قۇندىلىقتارىن ەستەن شىعارماڭىزدار.
مەرەكە قۇتتى بولسىن!
اسحات ايماعامبەتوۆ،
قازاقستان رەسپۋبليكاسىنىڭ ءبىلىم جانە عىلىم ءمينيسترى
پىكىر قالدىرۋ