قاراعاندى ​​وبلىسىنىڭ اكىمى جەڭىس قاسىمبەك كوروناۆيرۋستىڭ جاپپاي تارالۋىنا بايلانىستى تەمىرتاۋ جانە بۇقار جىراۋ اكىمدەرىنە سوگىس جاريالادى. بۇل تۋرالى Qamshy.kz اقپارات اگەنتتىگى Tengrinews دەرەگىن نەگىزگە الىپ حابارلايدى. 

ج. قاسىمبەك قالاداعى كوروناۆيرۋستىڭ ورشۋىنە تەمىرتاۋ قالاسىنىڭ اكىمى عالىم ءاشىموۆ پەن بۇقار جىراۋ اۋدانىنىڭ اكىمى شاگۋراشيد ءمامالينوۆتىڭ قىزمەت بارىسىنداعى جىبەرگەن ولقىلىقتارى سەبەپ بولعان دەپ ەسەپتەيدى. 

ول ءوز سوزىندە "نۇرقازعان" كەنىشىندەگى جۇمىسشىلاردىڭ جاپپاي ۆيرۋس جۇقتىرۋىن الدىن-الۋعا بولار ەدى دەپ اتاپ ءوتتى.

– وڭىرلەردەگى اكىمدەر كوروناۆيرۋستىڭ تارالۋ ءقاۋپىن تۇسىنبەيدى. جەدەل ارەكەت ەتىپ، باسقا مەملەكەتتىك ورگاندارمەن بىرگە ارەكەت ەتۋ دەگەن جوق. وڭىردەگى ەپيدەميولوگيالىق جاعدايدى تۇراقتاندىرۋ بويىنشا شارالار كۇشەيتىلمەگەن. مۇنىڭ تىكەلەي ناتيجەسى، اتاپ ايتساق، ۋاقىتىلى قابىلدانباعان شارالار تەمىرتاۋ مەن بوتاقارا اۋدانىندا جاپپاي ۆيرۋستىڭ تارالۋى. وسىعان بايلانىستى مەن قالانى قالىپقا كەلتىرۋ ءۇشىن ەكى اكىمگە تارتىپتىك جازا رەتىندە سوگىس جاريالايمىن، – دەدى جەڭىس قاسىمبەك.

سونداي-اق، ​​وبلىس باسشىسى كوپ جاعدايدا شەكتەۋ شارالارىن ساقتامايتىن تۇرعىنداردىڭ ۇقىپسىزدىعىن جەكە ءوزى قاداعالايتىنىن اتاپ ءوتتى.

– مەن كۇن سايىن كوشەدە تۇرعىنداردىڭ بەتپەردە كيمەي جۇرەتىنىن، قاشىقتىقتى ساقتاماي جينالعاندارىن باقىلاپ، كورىپ وتىرامىن. مۇنىڭ ادامدارعا اسا ءقاۋىپتى ەكەنىن ءتۇسىندىرۋ قاجەت، – دەدى جەڭىس قاسىمبەك.

ەستەرىڭىزگە سالا كەتەيىك، وبلىستا سوڭعى تاۋلىكتە COVID-19 جۇقتىرۋدىڭ 33 جاعدايى تىركەلگەن. جالپى ۆيرۋس جۇقتىرعاندار – 595، قايتىس بولعان – 3، ال ەمدەلىپ شىققاندار – 190.