الماتىدا ماسكالىق رەجيمدى ساقتاماعان تۇلعالارعا ايىپپۇل سالىنۋى مۇمكىن. بۇل تۋرالى ونلاين بريفينگتە قالا اكىمىنىڭ ءبىرىنشى ورىنباسارى ەرلان قوجاعاپانوۆ ايتتى.

– قالادا تولىعىمەن ماسكالىق رەجيم جاريالانعان. ازىرشە حالىققا ءتۇسىندىرۋ جۇمىستارى ءجۇرىپ جاتىر. ماسكالىق رەجيمنىڭ ماڭىزدىلىعى جوعارى. سەبەبى، بۇل ينفەكسيانىڭ ودان ءارى ورشۋىنە كەدەرگى كەلتىرەدى. اسىرەسە اۆتوبۋستار مەن حالىق كوپ شوعىرلانعان جەرلەردە تالاپ ەتىلەدى، – دەدى ەرلان قوجاعاپانوۆ.

قالا اكىمىنىڭ ءبىرىنشى ورىنباسارى ماسكا كيمەگەن تۇلعالارعا قاتىستى قانداي شارا قابىلداناتىنىن ايتتى.

– ءقازىر اكىمدىك وكىلدەرى مەن پوليسيا قىزمەتكەرلەرى ءتيىستى ينسترۋكسيا الدى. ەپيمەديولوگيالىق احۋال ۋشىعاتىن بولسا، ماسكا كيمەگەن ازاماتتارعا ايىپپۇل سالاتىن بولامىز. بۇل جەردە ق ر اكىمشىلىك قۇقىق بۇزۋشىلىق كودەكسىن قولداناتىن بولامىز، – دەدى ە.قوجاعاپانوۆ.

الماتىنىڭ باس مەملەكەتتىك سانيتارلىق دارىگەرى جانداربەك بەكشين ايىپپۇلداردىڭ مولشەرى تۋرالى ايتتى.

– ەگەر ازامات بەتپەردە كيۋگە قاتىستى كارانتيندىك شارالاردى بۇزسا، وندا ايىپپۇل مولشەرى 13 890 تەڭگە. ال ازاماتتارعا ماسكالارسىز كىرۋگە رۇقسات بەرگەن وبەكتىنىڭ لاۋازىمدى تۇلعالارىنا 41 670 تەڭگە ايىپپۇل سالىنادى. 

بۇگىن ءبىز بارلىق نىسانداردا بەتپەردە كيىپ ءجۇرۋدى تالاپ ەتەمىز. ەگەر دە  شاعىن بيزنەستە ادامدار رەجىمدى ساقتاماسا، وعان 277 800 تەڭگە ايىپپۇل سالىنادى، ال ورتا بيزنەستە – 555،600 تەڭگە، ۇلكەن بيزنەس بولسا، وبەكت تەك بەتپەردە جوق ادامدارعا مۇمكىندىك بەرگەندىكتەن، زاڭدى تۇلعا ءۇشىن ايىپپۇل 1 389 000 تەڭگە كولەمىندە ايىپپۇل تولەيدى، – دەدى ج. بەكشين.