ۇلتتىق قوعامدىق سەنىم كەڭەسىنىڭ مۇشەسى راۋان كەنجەحان ۇلى قازاقستانعا مەكتەپتەردىڭ جەتىسپەيتىنىن ايتىپ، ءبىر اۋىسىمدا وقۋدى ۇسىندى.

– قوعامدىق سەنىم كەڭەسىنىڭ ءماجىلىسى ءبىلىم بەرۋ تاقىرىبىنا ارنالۋى – ەلىمىزدەگى وزەكتى ماسەلەلەردىڭ ءبىرى. بىرىنشىدەن، باستى كەدەرگى – مەكتەپتىڭ جاعدايى دەپ ويلايمىن. ناقتىراق ايتساق، قازاقستانعا مەكتەپ جەتىسپەيدى. قازىرگى تاڭدا ەلىمىزدە 7400 مەكتەپ بار، وندا جالپى 3،5 ملن-نان اسا بالا وقيدى. ونىڭ 70 پايىزى ەكى اۋىسىمدا، ال 200-مىڭ بالا 3 اۋسىمدى مەكتەپتە وقيدى. سوڭعى جىلدارى قازاقستان ءبىلىم بەرۋدىڭ مازمۇنىن جاڭارتۋعا كوپ كۇش سالدى. ىلگەرى دامىعان ەلدەردىڭ تالاپتارىنا باعىتتالدى. ءبىراق ءبىز تالاپتارعا ۇمتىلعان ەلدەردىڭ ەشقايسىسىندا 3 نەمەسە 2 اۋىسىمدى وقىتاتىن مەكتەپ جوق، – دەدى كەڭەس مۇشەسى. 

ول ءوز سوزىندە ساپالى ءبىلىم بەرۋ ءۇشىن مەكتەپتىڭ ءبىر اۋىسىمدا جۇمىس ىستەۋى ماڭىزدى دەپ اتاپ ءوتتى.

– ءبىزدىڭ ەسەبىمىزشە ورتا ءبىلىم بەرۋ جۇيەسىن تولىقتاي 1 اۋىسىمعا وتكىزۋ ءۇشىن قازاقستانعا شامامەن 3 مىڭداي جاڭا مەكتەپ قاجەت. مۇنداي اۋقىمدى ماسەلەنى مەملەكەت تەك ءوز كۇشىمەن تەز ارادا شەشە المايدى. ءبىزدىڭ ۇسىنىسىمىز – مەكتەپ سالۋعا جەكە قورلاردى كەڭىنەن تارتۋ، – دەدى ر. كەنجەحان ۇلى.