ەلىمىز پاندەميانىڭ شارىقتاۋ شەگىنەن وتكەنىمەن، ىندەتپەن كۇرەس ءالى اياقتالعان جوق. بۇل تۋرالى ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا پرەزيدەنت قاسىم-جومارت توقايەۆ ايتتى.
– كوروناۆيرۋس ىندەتى جۇمىسىمىزعا ەلەۋلى وزگەرىس ەنگىزدى. قازىرگى تاڭدا ەلىمىز پاندەميانىڭ شارىقتاۋ شەگىنەن ءوتتى. ءبىراق ىندەتپەن كۇرەس ءالى اياقتالعان جوق. بۇل ىندەت وتە ءقاۋىپتى. باتپانداپ كىرەدى، مىسقىلداپ شىعادى، – دەدى توقايەۆ.
سونداي-اق پرەزيدەنت كوروناۆيرۋس ىندەتى قازىرگى الەمنىڭ قۇندىلىقتارىن ايتارلىقتاي وزگەرتكەنىن اتاپ ايتتى.
– دەنساۋلىق ساقتاۋ جۇيەسىنىڭ، ءوزىن-وزى قامتۋدىڭ، ىنتىماقتاسۋ مەن جاۋاپكەرشىلىكتىڭ ماڭىزى ارتا ءتۇستى. وسىعان سايكەس مەملەكەت قىزمەتىندە جانە قوعامدىق ءومىردىڭ بارلىق سالاسىندا تۇبەگەيلى وزگەرىستەر بولماق. پاندەميا ءبىزدىڭ ەلىمىز ءۇشىن دە ۇلكەن سىناق بولىپ وتىر. قازاقستان حالقى ەشقاشان دا قيىندىققا مويىعان ەمەس جانە وسى جولى بىرلىگىمىزدىڭ بەكەم ەكەنىن كورسەتتىك. ءبىز ىرىس پەن ىنتىماقتىڭ ارقاسىندا كەز كەلگەن سىناقتى ابىرويمەن ەڭسەرەمىز دەپ سەنەمىن، – دەپ اتاپ ءوتتى مەملەكەت باسشىسى.
پىكىر قالدىرۋ