ەلوردادا جۇك كولىگى اۆتوبۋسپەن سوقتىعىسىپ، 13 ادام اۋرۋحاناعا جەتكىزىلدى. بۇل تۋرالى قالالىق پوليسيا دەپارتامەنتىنىڭ باسپا ءسوز قىزمەتى مالىمدەدى.
ۆەدومستۆونىڭ مالىمەتىنشە، وقيعا 29 مامىر كۇنى ساعات 17:49-دا بولعان. «كاماز» جۇك كولىگىن باسقارىپ كەلە جاتقان 1994 جىلعى ازامات اقجول كوشەسىنىڭ بويىندا رولگە يە بولا الماي، جولدىڭ قارسى بەتىنە شىعىپ كەتكەن. جۇك كولىگى «مان» ماركالى اۆتوبۋسپەن سوقتىعىسقان. جول اپاتىنان اۆتوبۋستىڭ 13 جولاۋشىسى زارداپ شەگىپ، مەديسينا مەكەمەلەرىنە جەتكىزىلدى. قازىرگى ۋاقىتتا ەكى جولاۋشىنىڭ سۇيەگى سىنعانى، قالعاندارى ءتۇرلى دەڭگەيدە جاراقات العانى بەلگىلى بولدى.
اتالعان فاكتى بويىنشا ءقازىر سوتقا دەيىنگى تەرگەۋ جۇمىستارى جۇرگىزىلىپ جاتىر.
پىكىر قالدىرۋ