ترامپ اكىمشىلىگى "جۇڭگو اسكەري كۇشتەرىمەن بايلانىستى بولۋى مۇمكىن" دەپ بولجانعان مىڭداعان جۇڭگو ستۋدەنتتەرىنىڭ ۆيزالارىن جارامسىز ەتۋدى جوسپارلاپ وتىر. اقپارات تۋرالى العاش جازعان نيۋ-يورك تايمستىڭ مالىمەتىنشە، بۇل قادام 3000-نان 5000-عا دەيىنگى قىتايلىق ستۋدەنتتەرگە اسەر ەتۋى مۇمكىن. 

نيۋ-يورك تايمستىڭ اقپاراتىنشا، اقش-تىڭ ءبىر لاۋازىمدى تۇلعاسى جانە پرەزيدەنت اكىمشىلىگىنىڭ ىشكى تالقىلاۋلارىمەن تانىسقان تاعى ءبىر ادام بۇيرىق وسى اپتانىڭ ىشىندە تەز ارادا جاريالانۋى مۇمكىن ەكەنىن مالىمدەگەن .

ىشكى تالقىلاۋلارعا قاتىسقان قىزمەتكەردىڭ اقپاراتىنشا، امەريكا قۇراما شتاتتارىندا جۇرگەن قىتايلىق ستۋدەنتتەردىڭ ۆيزالارى كۇشىنەن قالدىرىلىپ، ەلدەن شىعارىلادى. ال اقش-تان تىس جۇرگەن قىتايلىق ستۋدەنتتەرگە قايتا امەريكاعا كىرۋگە رۇقسات بەرىلمەيدى.

– بۇل قادامنىڭ نەگىزگى ماقساتى - كەيبىر جۇڭگو ازاماتتارىنىڭ اقش ۋنيۆەرسيتەتتەرى مەن كوللەدجدەرىنە بارىپ، تىڭشىلىق پەن زياتكەرلىك مەنشىك ۇرلىعىن جاساۋىنا تىيىم سالۋ،– دەپ حابارلاعان اقپارات كوزدەرى. 

نيۋ-يورك تايمستىڭ مالىمەتىنشە، مۇنداي شەشىم كەيبىر اقش ۋنيۆەرسيتتەرى جاعىنان قارسىلىققا ۇشىراۋى مۇمكىن، سەبەبى اقش جوعارى وقۋ ورىندارىندا ءبىلىم الاتىن 360،000 جۇڭگو ازاماتى جىل سايىن وقۋ جانە باسقا تولەمدەر ارىقىلى ولارعا 14 ملرد دوللار قارجىلىق تابىس اكەلەدى.