بەلگىلى عالىم، فيلولوگيا عىلىمدارىنىڭ كانديداتى انار فازىلجان احمەت بايتۇرسىن ۇلى اتىنداعى ءتىل ءبىلىمى ينستيتۋتىنا باسشى بولىپ تاعايىندالدى. اقپاراتتى ءتىل ءبىلىمى ينستيتۋتى راستادى.

انار فازىلجان بۇعان دەيىن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ عالىم حاتشىسى، ا.بايتۇرسىن ۇلى اتىنداعى ءتىل ءبىلىمى ينستيتۋتى ديرەكتورىنىڭ ورىنباسارى قىزمەتىن اتقارعان.

ءتىل ءبىلىمى ينستيتۋتىنىڭ بۇرىنعى ديرەكتورى فيلولوگيا عىلىمدارىنىڭ دوكتورى، پروفەسسور ەردەن قاجىبەك، ينستيتۋتتاعى ءبولىم مەڭگەرۋشىلىگىنە اۋىسقان.

انار فازىلجانوۆا مۇرات قىزى 1974 جىلى الماتى وبلىسى اقسۋ اۋدانى جانسۇگىر كەنتىندە دۇنيەگە كەلگەن

1980 جىلى اقسۋ اۋدانى قاراكوز كەڭشارىنىڭ قىزىلوراق ورتا مەكتەبىنىڭ ءبىرىنشى سىنىبىنا قابىلدانىپ، 1991 جىلى ورتا مەكتەپتى جانسۇگىر كەنتىندەگى قازىرگى ج.سىدىقوۆ اتىنداعى ورتا مەكتەپتىڭ 11 سىنىبىن «التىن مەدالمەن» ۇزدىك بىتىرگەن.

سول جىلى تالدىقورعان قالاسىنداعى ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە قازاق مەكتەپتەرىندەگى ورىس ءتىلى مەن ادەبيەتى، قوسىمشا تاريح ماماندىعى بويىنشا وقۋعا ءتۇسىپ، 1996 جىلى وقۋ ورنىن ۇزدىك ديپلوممەن اياقتاپ شىقتى.

1996 جىلدىڭ قاراشاسىندا ق ر ۇلتتىق عىلىم اكادەمياسىنىڭ احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ جانىنداعى اسپيرانتۋرانىڭ كۇندىزگى بولىمىنە وقۋعا ءتۇستى.

1999 جىلى جەلتوقساندا اسپيرانتۋرانى ءبىتىرىپ، 2000 جىلدىڭ مامىرىندا ز.م.بازاربايەۆانىڭ عىلىمي جەتەكشىلىگىمەن «قازاق تىلىندەگى قوسقۇرامدى قۇرمالاس سويلەم ينتوناسياسى (ەكسپەريمەنتتىك-فونەتيكالىق زەرتتەۋ)» اتتى تاقىرىپتا كانديداتتىق ديسسەرتاسياسىن 10.02.02 – قازاق ءتىلى ماماندىعى بويىنشا قورعاپ شىقتى.

ءار جىلدارى ا.بايتۇرسىن ۇلى اتىنداعى ءتىل ءبىلىمى ينستيتۋتىندا عىلىمي قىزمەتكەر، كىشى عىلىمي قىزمەتكەر، اعا عىلىمي قىزمەتكەر بولىپ جۇمىس ىستەگەن.

2004 جىلدان 2008 جىلدار ارالىعىندا ينستيتۋتتىڭ عالىم حاتشىسى لاۋازىمىن اتقاردى.

2001-2003 جىلدار ارالىعىندا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە قازىرگى قازاق ءتىلى مەن ادىستەمەسى تەورياسى كافەدراسىندا وقىتۋشى بولىپ جۇمىس ىستەدى.

وسى ۋاقىتتا قازىرگى قازاق ءتىلىنىڭ فونەتيكاسى، مورفولوگياسى، سينتاكسيسى، سونداي-اق پارالينگۆيستيكا، كومپيۋتەرلىك لينگۆيستيكا سياقتى كۋرستاردان ءدارىس وقىپ، سەمينار ساباقتار جۇرگىزدى، قازاق فيلولوگياسى ماگيسترانتتارىنا ارنالعان «كومپيۋتەرلىك لينگۆيستيكا»، «پارالينگۆيستيكا»، ستۋدەنتتەرىنە ارنالعان «مورفولوگيا» كۋرستارى بويىنشا تيپتىك جانە جۇمىس باعدارلامالارىن ازىرلەدى.

1999-2002 جىلدارى تالانتتى جاس عالىمدارعا ارنالعان ق ر پرەزيدەنتىنىڭ ستيپەندياتى، 2007 جىلى م.اۋەزوۆ اتىنداعى تالانتتى جاس عالىمدارعا ارنالعان مەملەكەتتىك سىيلىقتىڭ يەگەرى، 2008 جىلى ق ر تۇڭعىش پرەزيدەنتى قورىنىڭ عىلىم مەن تەحنيكا سالاسىنداعى پرەمياسىنىڭ لاۋرەاتى اتاندى.