الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين بريفينگ بارىسىندا قالانىڭ مەملەكەتتىك باس سانيتار دارىگەرى جانداربەك بەكشين قالا تۇرعىندارىن بلوكبەكەتتەردىڭ الىنعانىنا قاراماستان، سانيتارلىق-ەپيدەميولوگيالىق شارالاردى ۇستانۋعا شاقىردى.

قالا تۇرعىندارى سانيتارلىق-ەپيدەميولوگيالىق تالاپتاردى، ماسكا تاعۋ رەجيمىن جانە الەۋمەتتىك قاشىقتىقتى قاتاڭ ساقتاۋلارى ءتيىس. كوپشىلىك ورىندارعا بارۋدان ساق بولۋ قاجەت.

بۇگىنگى تاڭدا الماتىدا كوروناۆيرۋس ينفەكسياسىن جۇقتىرۋدىڭ 2 647 جاعدايى تىركەلگەن. سونىمەن بىرگە، ونىڭ ايتۋىنشا، جۇقتىرۋدىڭ 90 پايىزدان استامى الدىن الا تەست پەن سكرينينگ جۇرگىزۋ كەزىندە انىقتالادى. ءبىر اپتاداعى كۇندەلىكتى ءوسىم جەكەلەگەن كۇندەرى 1،7%-دان 4،8%-عا دەيىن قۇراعان. بۇگىندە 1627 ادام اۋرۋدان ايىعىپ، ۇيلەرىنە شىققان.

– قالاداعى توپتار مەن بارلىق وسال كونتينگەنتتەر ۇنەمى تۇراقتى باقىلاۋدا. جۇيەلى تۇردە سكرينينگتىك زەرتتەۋ جۇرگىزەمىز. قازىرگى ۋاقىتتا ءبىز وسىعان دەيىن انىقتالعان بارلىق دەرلىك ءىرى وشاق ۋچاسكەلەرىن جويدىق. قالاداعى جالپى جاعداي باقىلاۋمىزدا، – دەپ ءتۇسىندىردى ج.بەكشين.

– ءبىز كارانتين شارالارىنىڭ – تۇرعىنداردىڭ قالاعا كىرۋى مەن شىعۋىنا قاتىستى ءبىر بولىگىن الىپ تاستادىق. ءبىزدىڭ كاسىپورىندارىمىزدىڭ جانە ءبىرىنشى كەزەكتە، ولاردىڭ قىزمەتكەرلەرىنىڭ بارلىق شەكتەۋ شارالارىن قولدانعان جاعدايدا جۇمىستارىن قايتا باستاۋىنا مۇمكىندىك بەردىك، – دەدى ج. بەكشين.