الماتى قالالىق پوليسيا دەپارتامەنتىنىڭ باسشىسى قانات تايمەردەنوۆ بلوكبەكەتتە بولعان جول-كولىك وقيعاسىنا پىكىر ءبىلدىردى.
تايمەردەنوۆ پوليسيا قىزمەتكەرلەرى جاراس جانعازييەۆ پەن داستان ءابدىقانوۆتىڭ قازا بولۋ فاكتىسى بويىنشا تەرگەۋ ق ر قىلمىستىق كودەكسىنىڭ 99-بابىنىڭ 2ء-بولىمى بويىنشا باستالعانىن اتاپ ءوتتى.
– ىشكى ىستەر ءمينيسترى بارلىق بولىمشەلەر باسشىلارىنىڭ ىس-ارەكەتىنە ءپرينسيپتى باعا بەردى جانە كىنالى ادامدار جازالاندى. سونىمەن قاتار تەرگەۋ مۇقيات جۇرگىزىلىپ جاتىر. ازىرگە، ق ر قىلمىستىق ءىس جۇرگىزۋ كودەكسىنىڭ «سوتقا دەيىنگى تەرگەۋ مالىمەتتەرىن جاريالاۋعا جول بەرىلمەۋى» تۋرالى 21-بابىنا سايكەس، ءبىز قانداي-دا ءبىر نۇسقانى ايتا المايمىز، – دەدى قانات تايمەردەنوۆ.
ول قۇقىق قورعاۋ ورگاندارىندا بۇرىن جۇمىس ىستەگەن كولىك جۇرگىزۋشىسى ازامات ازاماتوۆقا قاتىستى تەرگەۋ ارەكەتتەرى بارلىق نورمالاردى ساقتاي وتىرىپ، جۇرگىزىلەتىنىن جانە ول جاۋاپكەرشىلىككە تارتىلاتىنىن اتاپ ايتتى.
– كولىكتى كىم جۇرگىزگەنى ماڭىزدى ەمەس. ول بۇرىنعى قۇقىق قورعاۋ ورگاندارىندا جۇمىس ىستەگەن نەمەسە جۇمىستان شىعارىلدى ما، ونىڭ دا ماڭىزى جوق. ول قىلمىس ەكەنىن ءبىلىپ تۇرىپ، ماس كۇيىندە كولىككە وتىردى. سول ءۇشىن جاۋاپ بەرەدى، – دەپ اتاپ ايتتى ق. تايمەردەنوۆ.
وسىلايشا دەپارتامەنت باسشىسى الەۋمەتتىك جەلىلەردە مالىمدەمەلەر جاساپ، قاۋەسەت تاراتپاۋعا جانە تەرگەۋدىڭ رەسمي قورىتىندىسىن كۇتۋدى سۇرادى.
ەسكە سالا كەتەيىك، بلوكبەكەتتە قايتىس بولعان داستان ءابدىقانوۆتىڭ اناسى جاناتگۇل ءابدىروۆا پرەزيدەنت توقايەۆتان ۇلىنىڭ ولىمىنە قاتىستى تەرگەۋدى قاتاڭ قاداعالاۋدى سۇراعان بولاتىن.
پىكىر قالدىرۋ