بەلگىلى دارىگەر قايىرعالي كونەيەۆ پرەزيدەنت ق.توقايەۆتى ءماجىلىستى تاراتۋعا شاقىردى، دەپ جازادى kaztag.kz.

– ءسىزدى پەتيسياعا قول قويعان 170 مىڭ ادامنىڭ پىكىرىن ەسكەرمەستەن، حالىققا قارسى دەنساۋلىق تۋرالى كودەكس قابىلداعان ق ر پارلامەنتى ءماجىلىسىن تاراتۋعا باستاماشىل بولۋعا شاقىرامىن. ءماجىلىس حالىقتىڭ ءۇنى مەن مۇددەسىنە قۇلاق اسقان جوق. تەك كەيبىر رەزونانستىق سوزدەردى الماستىرىپ، كودەكس ءمانىن وزگەرىسسىز قالدىردى. كودەكسكە قارسى شىعىپ، پەتيسياعا قول قويعان 170 مىڭ ادام وزدەرىن كەمسىتكەندەي سەزىنۋدە. ولار وزدەرىنىڭ كونستيتۋسيالىق قۇقىعى بۇزىلدى دەپ سانايدى، – دەيدى دارىگەر،

ول 11 شىلدەدە الماتىدا انتيحالىقتىق دەنساۋلىق تۋرالى كودەكسكە قارسى بەيبىت ميتينگ وتكىزۋگە ءوتىنىش ءبىلدىرىپ قويعانىن ءمالىم ەتتى.

– بۇگىندە نۇر-سۇلتان، شىمكەنت، قاراعاندى قالالارىنىڭ بەلسەندىلەرى ءوز ايماقتارىندا ميتينگ ۇيىمداستىرۋعا نيەتتى. بىزگە قوسىلعىسى كەلىپ، وزگە ايماقتاردان دا جازىپ جاتىر. كودەكسكە قارسى پەتيسياعا قول قويعان 170 مىڭ ادام قارسىلىقتارىن بىلدىرەتىن سياقتى، –  دەپ اتاپ ءوتتى ول. 

دارىگەردىڭ سوزىنشە، 170 مىڭنىڭ دەنى ايەل ادامدار.

– جوعارىدا ايتىلعانداردى نازارعا الا وتىرىپ، سىزدەن (توقايەۆ – رەد.) ق ر پارلامەنتى ءماجىلىسىن تاراتۋ پروسەدۋراسىن باستاۋدى سۇرايمىن. ويتكەنى قازىرگى قۇرام حالىق سەنىمىنەن تولىقتاي ايىرىلدى، حالىق مۇددەسىن قورعاماق تۇرماق، ونىمەن ديالوگ جاساي المايتىنىن كورسەتتى، –  دەپ تۇيىندەدى قايىرعالي قونايەۆ.