الماتى وبلىسىندا جىل باسىندا ەرىكتىلەردىڭ سانى 1043 بولسا، ءقازىر ولاردىڭ سانى 2033-كە جەتكەن. ولار كومەككە مۇقتاج جاندارعا جاردەم كورسەتۋمەن اينالىسىپ، دەزينفەكسيالىق جۇمىستارعا اتسالىسۋدا، سول سياقتى قاۋىرت جەلى بايلانىس تەلەفونىندا جۇمىس ىستەيدى. بۇل تۋرالى الماتى وبلىسى اكىمىنىڭ باسپا ءسوز قىزمەتى حابارلادى.

ءوڭىر ەرىكتىلەرىنىڭ اتسالىسۋىمەن 50 مىڭ مەديسينالىق ماسكا تىگىلىپ، تاراتىلدى. الەۋمەتتىك جاعدايى تومەن، از قامتىلعان جانە كوپ بالالى وتباسىلار مەن جالعىزباستى انالارعا، جالپى 10 مىڭ وتباسىنا الەۋمەتتىك كومەك كورسەتىلىپ، ازىق-تۇلىكپەن قامتاماسىز ەتىلدى. سول سياقتى ۆولونتەرلار جالعىزباستى قاريالاردىڭ ۇيلەرىنە تازالىق جۇمىستارىن جۇرگىزەدى. وسىنداي جۇمىستاردى بەلسەنە اتقارىپ جۇرگەن «جەتىسۋ ەرىكتىلەرى» ۇيىمىنىڭ مۇشەسى، وبلىستىق «مەيىرىمدى جەتىسۋ» فرونت-كەڭسەسىنىڭ ۇيلەستىرۋشىسى جانسايا سماعۇلوۆاعا وبلىس اكىمى اماندىق باتالوۆ پرەزيدەنتتىڭ العىس حاتىن تاپسىردى.

قۇتتىقتاۋ بارىسىندا وبلىس باسشىسى جانسايانىڭ توتەنشە جاعداي كەزىندە ۇجىمدىق ەرىكتىلىكتى ۇيىمداستىرۋداعى، مۇقتاج جاندارعا قول ۇشىن سوزۋ جۇمىستارىن ۇيلەستىرۋدەگى، ۆولونتەرلاردىڭ اتقارعان ىستەرىن باق-تا ناسيحاتتاۋداعى ۇلەسىن اتاپ ءوتىپ، پرەزيدەنتتىڭ العىس حاتىن جانە سىي رەتىندە ءوزىنىڭ قولتاڭباسى بار كىتاپ تابىستادى.

- مەيىرىمدىلىك الەمدى قۇتقارادى دەگەن ءسوز بەكەر ايتىلماعان. قايتارىمىن سۇراماي، شىن نيەتپەن جاسالعان جاقسىلىق قاشاندا ادامنىڭ الدىنان شىعادى. سوندىقتان جاقسىلىق جاساۋ كەز كەلگەن ادامنىڭ ومىرلىك ماقساتى بولۋى ءتيىس. ەلىمىز ءۇشىن وسى ءبىر قيىن-قىستاۋ كەزەڭدە ۆولونتەرلاردىڭ، سونىڭ ىشىندە ءوزىڭنىڭ اتقارعان ىزگى ىستەرىڭنىڭ حالىققا كوپ پايداسى ءتيدى، - دەي كەلە اماندىق باتالوۆ ءوزىنىڭ ومىرلىك تاجىريبەسىنەن مىسالدار ايتتى. سول سياقتى جانسايانىڭ بولاشاقتاعى جوسپارلارى تۋرالى سۇرادى.

اتاپ وتسەك، جانسايا سماعۇلوۆا ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ «جۋرناليستيكا» ءبولىمىن بىتىرگەن. بۇگىندە «جەتىسۋ ەرىكتىلەرى» ۇيىمىنىڭ مۇشەسى، وبلىستىق «مەيىرىمدى جەتىسۋ» فرونت-كەڭسەسىنىڭ ۇيلەستىرۋشىسى. الدا جۋرناليستىك جولدى جالعاستىرۋ دا ويىندا بار.

ءوز كەزەگىندە ج. سماعۇلوۆا وبلىس اكىمىنە ءوزىن جىلى قابىلداعانى ءۇشىن العىسىن ايتتى.

 - بۇل ماراپات ماعان عانا ەمەس، بارلىق جەتىسۋلىق ەرىكتىلەرگە بەرىلگەن ماراپات دەپ دەپ بىلەمىن. ءبىز بىرلىگىمىزبەن عانا كۇشتىمىز.  مەن جالعىز ءوزىم ەشتەڭە تىندىرا الماس ەدىم، سوندىقتان بۇل - ورتاق جەڭىس. بۇگىنگى العىس حات بۇدان بىلايعى جۇمىسىمىزعا ۇلكەن سەرپىن بەرەدى. پرەزيدەنتىمىزگە ۆولونتەرلاردى نازاردان تىس قالدىرماعانىنا ريزاشىلىعىمىزى بىلدىرەمىز. بۇل جۇمىستاردى ءبىز ءوز اتىمىزدى شىعارۋ ءۇشىن ەمەس، جۇرەك قالاۋىمەن جاساپ ءجۇرمىز. ءبىز ءۇشىن ەڭ ۇلكەن ماراپات – حالىقتىڭ العىسى، - دەدى ول.

جالپى، بۇگىنگى كۇنى وبلىستا 2033 ەرىكتى جاس تىركەلگەن. ولار ازاماتتاردى ۆولونتەرلىككە تارتۋ، كومەككە مۇقتاج جاندارعا الەۋمەتتىك كومەك كورسەتۋ ماقساتىندا جۇمىس اتقارۋدا. سونداي-اق توتەنشە جاعدايلارعا بايلانىستى 404-404 قاۋىرت جەلى بايلانىس تەلەفونى قىزمەت ىستەيدى. تاۋلىك بويى ءوز جۇمىسىن جالعاستىراتىن جەدەل جەلى تۇتقاسىندا حالىققا ءبىرىنشى كەزەكتە كومەگى قاجەت ماماندار، اتاپ ايتار بولساق، دەنساۋلىق ساقتاۋ سالاسىنىڭ ماماندارى، جۇمىسپەن قامتۋ جانە الەۋمەتتىك باعدارلامالار بويىنشا ارنايى ماماندار، ءبىلىم باسقارماسىنىڭ ماماندارى مەن ەرىكتىلەر قىزمەتىن ۇيىمداستىرۋشى جاستار  وتىرادى. بۇگىنگى كۇنى قاۋىرت جەلى ارقىلى بايلانىسقان وبلىس تۇرعىندارىنىڭ سانى - 4736 ادام.

سول سياقتى دەزينفەكسيالىق جۇمىستارعا اتسالىسۋ، ازىق-تۇلىك تاسىمالداۋ، مەديسينالىق جەكە قورعانىس قۇرالدارىمەن قامتاماسىز ەتۋمەن اينالىسىپ كەلەدى.