«جەتىسۋ ۆولفرامى» ج ش س ءوزىنىڭ قحر-داعى بيزنەس-سەرىكتەستەرىمەن بىرگە گۋمانيتارلىق كومەك رەتىندە الماتى وبلىسىنىڭ اكىمدىگىنە 60 مىڭ مەديسينالىق ماسكا بەردى، دەپ حابارلادى الماتى وبلىسى اكىمىنىڭ باسپا ءسوز قىزمەتى.

كوروناۆيرۋسپەن كۇرەس شارالارى ءۇشىن قازاقستانعا جالپى سانى 228 مىڭنان استام ءبىر رەتتىك پايدالاناتىن ءۇش قاباتتى مەديسينالىق ماسكا تەگىن بەرىلدى.

«Jiaxin International Resources Investment Co.، Ltd» كورپوراسياسىنىڭ ۆيسە-پرەزيدەنتى، «جەتىسۋ ۆولفرامى» ج ش س اتقارۋشى ديرەكتورى نازار تەرلىگانىڭ ايتۋىنشا، مەديسينالىق ماسكانى جەتكىزۋ قازاقستان رەسپۋبليكاسىنىڭ سىرتقى ىستەر جانە دەنساۋلىق ساقتاۋ مينيسترلىكتەرىنىڭ، سول سياقتى قىزىل جارتى اي قوعامىنىڭ تىكەلەي قولداۋىمەن جۇزەگە اسىرىلعانىن ايتتى:

- كوروناۆيرۋس ينفەكسياسىنىڭ تارالۋىنا بايلانىستى قازىرگى قيىن جاعدايدا ءبىز كورپوراتيۆتىك الەۋمەتتىك جاۋاپكەرشىلىكتىڭ ەڭ جوعارعى پرينسيپتەرىن بەرىك ۇستانامىز. «جەتىسۋ ۆولفرامى» ج ش س ءوزىنىڭ ستراتەگيالىق سەرىكتەستەرىنىڭ ءبىرى «Jiangxi Cooper Corporation» كورپوراسياسىمەن بىرگە قازاقستاننىڭ قىزىل جارتى اي جەدەل قىزمەتى ارقىلى زور كومەك كورسەتۋدە. گۋمانيتارلىق كومەك كورسەتۋ - جالپى جۇمىسىمىزدىڭ ەڭ ماڭىزدى بولىگى»، - دەدى ول.

اتاپ وتسەك، «جەتىسۋ ۆولفرامى» ج ش س ۆولفرام كەنىن وندىرۋگە ماماندانعان. ينۆەستيسيالىق جوبا وتكەن جىلدان بەرى الماتى وبلىسى ەڭبەكشىقازاق اۋدانىندا جۇزەگە اسىرىلۋدا، ءقازىر 400 جۇمىس ورنى اشىلعان. ينۆەستيسيالىق جوبانىڭ جالپى قۇنى – 250 ملن. اقش دوللارى.