قىتايدىڭ گۋانسي پروۆينسياسىنداعى باستاۋىش مەكتەپ كۇزەتشىسى 40-قا جۋىق ادامدى پىشاقتاپ، جاراقاتتادى. بۇل تۋرالى Qamshy.kz اقپارات اگەنتتىگى thepaper.cn-گە سىلتەمە جاساپ حابارلايدى.

وقيعا بۇگىن تاڭعى 9-دا بولعان. 50 جاستاعى كۇدىكتى باستاۋىش مەكتەپتە كۇزەتشى بولىپ ىستەگەن. ماسەلەمەن تانىس جەرگىلىكتى تۇرعىننىڭ ايتۋىنشا، شابۋىل سالدارىنان 40-قا جۋىق وقۋشى مەن وقىتۋشى زارداپ شەكتى.

ولاردىڭ ۇشەۋى، اتاپ ايتقاندا، باستاۋىش مەكتەپتىڭ ديرەكتورى، تاعى ءبىر كۇزەتشى جانە وقۋشى اۋىر جاراقات الدى. مەكتەپتىڭ كىرەبەرىسىندە كوپ ادام جينالىپ، جەدەل جاردەم كولىكتەرى كەلىپ، بالالاردى اۋرۋحاناعا جەتكىزىپ جاتقانى تۋرالى بىرنەشە بەينەروليك جەلىدە تارالىپ جاتىر.

جەرگىلىكتى تۇرعىندار جۋرناليستەرگە زارداپ شەككەندەردىڭ كوپشىلىگى شامامەن 6 جاسقا دەيىنگى، مەكتەپكە دەيىنگى جاستاعى بالالار ەكەنىن ايتتى. 

دەرەككوز: قازاقپارات