نۇر-سۇلتان اكىمدىگىنىڭ قىزمەتكەرلەرى مەملەكەتتىك رامىزدەر كۇنىنە ارنالعان اكسياعا قاتىستى، دەپ حابارلايدى ەلوردا اكىمدىگىنىڭ رەسمي سايتى.

بۇگىن نۇر-سۇلتان اكىمدىگىنىڭ قىزمەتكەرلەرى قازاقستاننىڭ ءانۇرانىن شىرقاپ، مەملەكەتتىك رامىزدەر كۇنىنە ارنالعان چەللەندجە قاتىستى.

باستاماشىلاردىڭ ايتۋىنشا، پاتريوتتىق اكسيانى 100-دەن استام ۇيىم، ونىڭ ىشىندە بيزنەس وكىلدەرى قولدادى. الەۋمەتتىك جەلىلەردە # مەنىڭتۋىم # مەملەكەتتىكرامىزدەر # بىزبىرگەمىز #مەنىڭەلىمقازاقستان حەشتەگتەرىمەن 3000-نان استام جازبالار مەن ۆيدەولار جاريالاندى.

«مەن بارشا قازاقستاندىقتاردى وسى ۇلى مەرەكەمەن قۇتتىقتايمىن. تاۋەلسىزدىگىمىز ماڭگىلىك بولسىن!» – دەدى نۇر-سۇلتان قالالىق ءدىن ىستەرى باسقارماسىنىڭ باستىعى نۇرداۋلەت ءالمۇحانوۆ.

«مەملەكەتتىك رامىزدەر كەز كەلگەن مەملەكەتتىڭ دامۋىنىڭ اجىراماس بولىگى. بۇل حالىقتىڭ كەلىسىمى مەن بىرلىگىنىڭ، ەلىمىزدىڭ ەگەمەندىگى مەن تۇراقتىلىعىنىڭ بەلگىسى. وتانعا دەگەن سۇيىسپەنشىلىك، پاتريوتيزم مەملەكەتتىك رامىزدەردى قۇرمەتتەۋدەن باستالادى. ءاربىر قازاقستاندىقتىڭ ازاماتتىق پارىزى – قاسيەتتى قۇندىلىقتارعا دەگەن تەرەڭ قۇرمەت. مەن ەلىمىزگە ودان ءارى وركەندەۋ تىلەيمىن!» – دەدى ءوز كەزەگىندە نۇر-سۇلتان قالاسىنىڭ تىلدەردى دامىتۋ جانە مۇراعات ءىسى باسقارماسىنىڭ باستىعى تىلەۋعالي قىشقاشبايەۆ.

حابارلانعانداي، بۇگىن ەلوردادا مەملەكەتتىك رامىزدەر كۇنىنە ارنالعان اكسيا ءوتتى. ازاماتتار ەلدىڭ باستى ءانىن ايتىپ، بىر-بىرىنە جولداۋدا. #مەنىڭتۋىم #مەملەكەتتىكرامىزدەر #بىزبىرگەمىز #مەنىڭەلىمقازاقستان حەشتەگتەرىن قولدانعان بەينەروليكتەر الەۋمەتتىك جەلىلەردە جاريالاندى.

بەينەروليكتەر پاتريوتتىق سەزىمدى، ەلوردا تۇرعىندارىنىڭ بىرلىگىن نىعايتۋعا ارنالعان جانە مەملەكەتتىك رامىزدەرگە قۇرمەت كورىنىسى.

4 ماۋسىم – قازاقستان رەسپۋبليكاسىنىڭ مەملەكەتتىك رامىزدەرى كۇنى. مەملەكەتتىك رامىزدەر – بۇكىل الەمدە ەلدىڭ تاۋەلسىزدىگىن، حالىقتىڭ ءپاتريوتيزمىن، باتىرلىعى مەن دانالىعىن، جارقىن بولاشاققا ۇمتىلىسىنىڭ، مەملەكەتىمىزدىڭ وتكەنى، بۇگىنى مەن بولاشاعى اراسىنداعى ساباقتاستىقتىڭ بەينەسى.

وسى مەرەكەنى اتاپ ءوتۋ جانە مەملەكەتتىك رامىزدەرگە دەگەن قۇرمەتتى ارتتىرۋ ماقساتىندا نۇر-سۇلتان قالاسىندا ءبىرقاتار ءىس-شارالار وتكىزىلەدى.