وتاندىق ب ا ق سالاسىن دامىتۋ ماسەلەلەرىنە ارنالعان دوڭگەلەك ۇستەل جيىنىندا ءماجىلىس دەپۋتاتى دارحان مىڭباي باق-تىڭ قوعامدىق ساناعا اسەرى تۋرالى ايتتى، دەپ حابارلايدى قازاقپارات.

دەپۋتات ب ا ق سالاسىندا قول جەتكەن تابىستار دا بارشىلىق، شەشىمىن تاپپاعان ماسەلەلەردە جەتكىلىكتى ەكەنىن ايتا كەلە، ولاردىڭ ساراپتاۋ ءۇشىن وسىنداي جيىنداردىڭ ماڭىزى زور ەكەنىن اتاپ ءوتتى.

– ب ا ق سالاسىنداعى نەگىزگى ماسەلەلەرگە توقتالساق، الدىمەن كاسىبي جۋرناليستەردى دايارلاۋ ىسىنە ءمان بەرۋ كەرەك. ولاردى اۋەسقوي جۋرناليستەردەن اجىراتا ءبىلۋ ماڭىزدى. سالانىڭ وبالىن كاسىبي جۋرناليستيكادان كورمەسىن دەسەك، ارنايى جوو-لاردىڭ، ب ا ق ۇجىمدارىنىڭ، قاۋىمداستىقتاردىڭ ىنتىماقتاستىعىن كۇشەيتۋ قاجەت. الەۋمەتتىك جەلىلەردىڭ دامۋىنا دا كاسىبي جۋرناليستەر كوپ ۇلەس قوسۋدا. بلوگەرلەردىڭ شەبەرلىك ساباعىن، لەكسيالارىن ۇيىمداستىرسا، دۇرىس بولار ەدى. سالالىق مامانداندىرۋ ءۇردىسىن جالعاستىرىپ، 30 ەلدىڭ قاتارىنا قوسىلۋ ءۇشىن سالالىق جۋرناليستيكانىڭ تىنىسىن اشىپ، دۇنيەگە كورشىنىڭ كوزىمەن قاراۋ، الەمدى قوڭسىنىڭ قۇلاعىمەن تىڭداۋ ادەتىنەن ارىلۋىمىز كەرەك، – دەدى دارحان مىڭباي.

سونىمەن قاتار، دەپۋتات مەملەكەتتىك تاپسىرىس كولەمىن ۇلعايتۋ، ونى ورىنداۋ كريتەرييلەرىن وزگەرتۋ، ەلىمىزدىڭ زاڭدارىن ءتيىمدى پايدالانۋ، سونىڭ ىشىندە اقپاراتقا قول جەتكىزۋ ماسەلەلەرىنە نازار اۋداردى.