الاكولدىڭ شىعىس جاعالاۋى تۋريستەردى 13 ماۋسىمنان باستاپ قابىلداي باستايدى. بيىلعى ماۋسىمدا كوروناۆيرۋس ينفەكسياسىنا بايلانىستى دەمالۋشىلاردىڭ قاۋىپسىزدىگى، دەنساۋلىعىنا اسا باسىمدىلىق بەرىلمەك. سەبەبى مۇنداعى قىدىرۋ-دەمالۋ جانە جاعالاۋ ايماقتارى تىعىز ورنالاسقاندىقتان، ينفەكسيا جۇقتىرىپ الۋ مۇمكىندىگى دە جوعارى.

وسىعان وراي ارنايى مونيتورينگتىك توپ كۇن سايىن باقىلاۋدى، تەكسەرۋدى قولعا العان.

– بارلىق دەمالىس بازالارى سانيتارلىق-ەپيدەميلوگيالىق نورمانى تولىعىمەن ساقتاۋعا ءتيىس. وسى جىلدىڭ ەرەكشەلىگى دەمالىس بازالارىنىڭ يەلەرى تەك قانا ارنايى دايىندىق تۋرالى اكتىسى بار بولعان كەزدە عانا جۇمىستارىن باستاي الادى. ودان بولەك دەمالۋشىلاردىڭ COVID-19 تالداۋىنان تەكسەرىستەن ءوتتى دەگەن انىقتاما كەرەك. بۇل تۋرالى بارلىق دەمالىس بازالارىنا، تۋريستىك كومپانيالارعا ايتىلدى، ەسكەرتىلدى جانە ولار دەمالۋشىلارعا جولدامالاردى ساتىپ الاردا وسى تالاپتاردى ايتىپ، ءتۇسىندىرۋى شارت، – دەيدى شقو-نىڭ باس مەملەكەتتىك سانيتارلىق دارىگەرى مارات يسمايلوۆ.

ارنايى مونيتورينگتىك توپ بۇگىندە 175 دەمالىس بازاسىن تەكسەرىپ ۇلگەرگەن. الايدا ونىڭ 59-ى عانا ازىرگە بارلىق تالاپ-نورمانى ساقتاپ، دەمالۋشىلاردى قابىلداۋعا دايىن وتىر.

– ماۋسىمنىڭ اشىلۋىنا تولىعىمەن دايىنبىز. بازاعا كەلەتىن ءار دەمالۋشىنىڭ دەنە قىزۋى ولشەيمىز، قولدارىن انتيسەپتيكپەن زالالسىزداندىرادى. تەك سودان كەيىن عانا ءبىزدىڭ اۋماققا وتە الادى، – دەيدى «الاتاۋ» دەمالىس بازاسىنىڭ يەسى گۇلنار ابىلعازينوۆا.

سونىمەن الاكول كولىندە ورتاق سەرۋەندەۋ جانە جاعاجاي ايماقتارىنىڭ بولۋىنا بايلانىستى جاپپاي جۇقتىرۋ جاعدايلارىن بولدىرماۋ ءۇشىن:

«اربات» جاعاجاي جانە سەرۋەندەۋ ايماقتارىندا دەمالۋشىلاردىڭ ءبىر وتباسى مۇشەلەرىن قوسپاعاندا، بارلىق جاعىنان كەمىندە 2 مەتر الەۋمەتتىك قاشىقتىقتى ساقتاۋىنا باقىلاۋدى قامتاماسىز ەتىلەدى.

جاعالاۋداعى ورتالىق تراسسانىڭ بويىندا ورنالاسقان تۋريستتىك اقپاراتتىق ورتالىقتا «دەمالۋشىنىڭ ساۋالناماسى» جۇرگىزىلەدى.

مەرزىمى وتپەگەن COVID-19 زەرتتەۋلەرىنەن ءوتۋ ناتيجەلەرى تۋرالى انىقتاما بولعان جاعدايدا عانا ورنالاستىرۋدى قامتاماسىز ەتە الادى. ءبىر وتباسى ءۇشىن ونىڭ ءبىر مۇشەسىنىڭ زەرتتەۋ ناتيجەسىنىڭ بولۋى جەتكىلىكتى.

دەمالىس بازالارى مەن تاماقتانۋ ورىندارىندا جارتىسىن عانا ءبىر مەزگىلدە بولۋى جالپى ورىننىڭ 50 پايىزىنان اسپاۋعا ءتيىس، سونداي-اق اشىق الاڭداردا جۇمىس ىستەۋگە رۇقسات ەتىلدى.

بۇل رەتتە، ۇستەلدەردىڭ شەتكى ورىندارى اراسىندا كەمىندە 2 مەتر الەۋمەتتىك قاشىقتىق ساقتالۋعا ءتيىس.

تۇراتىن ورىنداردا، جالپى پايدالانۋ جانە ادامدار كوپ جينالاتىن جەرلەردە ماسكالىق رەجيمدى جانە الەۋمەتتىك قاشىقتىقتى (ءبىر وتباسى مۇشەلەرىن قوسپاعاندا، كەمىندە ەكى مەتر) قاتاڭ ساقتاۋى كەرەك.