قارجى ءمينيسترى ەرۇلان جاماۋبايەۆ بيۋدجەت قاراجاتىن ۋاقىتىلى يگەرە الماي جاتقان مينيسترلىكتەر مەن اكىمدىكتەردى اتادى.

"مەملەكەتتىك بيۋدجەت شىعىستارى - 97،9%، رەسپۋبليكالىق - 98،9%، جەرگىلىكتى بيۋدجەتتەر - 97،2% اتقارىلدى. رەسپۋبليكالىق بيۋدجەتتىڭ شىعىستارى ەسەپتى كەزەڭدە 5 ترلن 620 ملرد تەڭگەنى قۇرادى. بيۋدجەت قاراجاتى 61 ملرد تەڭگەگە اتقارىلمادى. ونىڭ 15 ملرد تەڭگەسى ۇنەمدەۋ بولدى. يگەرىلمەگەن سوما - 46 ملرد تەڭگە. بيۋدجەت قاراجاتىن ۋاقىتىلى يگەرە الماي جاتقان مەملەكەتتىك ورگاندار: ۇلتتىق ەكونوميكا مينيسترلىگى – 7،3 ملرد تەڭگە، ىشكى ىستەر مينيسترلىگى – 6،4 ملرد تەڭگە، دەنساۋلىق ساقتاۋ مينيسترلىگى – 4،8 ملرد تەڭگە، جوعارعى سوت – 4،5 ملرد تەڭگە، قورعانىس مينيسترلىگى – 4،2 ملرد تەڭگە"، - دەدى ەرۇلان جاماۋبايەۆ ۇكىمەت وتىرىسىندا.

مينيستر قارجىنىڭ يگەرىلمەۋىنىڭ نەگىزگى سەبەپتەرى - كونكۋرستىق راسىمدەردى ۇزاق جانە ۋاقتىلى وتكىزبەۋ، ناقتى كورسەتىلگەن قىزمەتتەر، اتقارىلعان جۇمىس كولەمىنە تولەۋ، شارتتاردى جاساسۋ راسىمدەرىن ۇزاق جۇرگىزۋ، تولەم بويىنشا قۇجاتتاردى ۇزاقمەرزىمدى كەلىسۋ ەكەنىن اتاپ ءوتتى.

"جەرگىلىكتى بيۋدجەتتەردىڭ شىعىستارى 2 ترلن 606 ملرد تەڭگەنى قۇرادى. 75 ملرد تەڭگە ورىندالمادى. وڭىرلەرگە 2 ترلن 317 ملرد تەڭگە نىسانالى ترانسفەرت قاراستىرىلعان. الدىن الا دەرەكتەر بويىنشا، وعان 671 ملرد تەڭگە ءبولىندى. ونىڭ 96% نەمەسە 643 ملرد تەڭگەسى يگەرىلدى. ورىندالماعان سوما - 28 ملرد تەڭگە. ونىڭ 8 ملرد تەڭگەسى - بيۋدجەت قاراجاتىن ۇنەمدەۋ بولسا، ال 20 ملرد تەڭگە - يگەرىلمەدى"، - دەدى ول.

بۇل رەتتە ەڭ كوپ يگەرىلمەگەن قاراجات مىنا وڭىرلەردە قالىپتاسقان: الماتى قالاسى – 3،4 ملرد تەڭگە، باتىس قازاقستان – 2،7 ملرد تەڭگە، پاۆلودار – 2،6 ملرد تەڭگە، قىزىلوردا – 2،4 ملرد تەڭگە، قاراعاندى – 2 ملرد تەڭگە، ماڭعىستاۋ – 1،6 ملرد تەڭگە، اقمولا جانە تۇركىستان وبلىستارىندا – 0،9 ملرد تەڭگەدەن، نۇر-سۇلتان قالاسى جانە الماتى وبلىسىندا – 0،8 ملرد تەڭگە.