«Nur Otan» پارتياسىنىڭ باسپا ءسوز قىزمەتى الەۋمەتتىك جەلىلەردەگى رەسمي پاراقشالارىندا پرايمەريز وتكىزۋ ماسەلەلەرى بويىنشا ارنايى جەدەل جەلىنىڭ ىسكە قوسىلاتىنىن حابارلادى.

8 800 080 44 41 تەگىن ءنومىرى ارقىلى ۇمىتكەرلەر پارتياشىلىك ىرىكتەۋگە قاتىسۋ ءۇشىن ءوتىنىمدى قالاي بەرۋگە بولاتىندىعى، ونلاين-وقۋعا قاتىسۋ مۇمكىندىگى جانە ت.ب. پرايمەريزگە قاتىستى وزدەرىن تولعاندىرعان سۇراقتار بويىنشا حابارلاسا الادى.

ونلاين-كونسۋلتاسيانى komek@nurotan.kz ەلەكتروندى پوشتاسى، 8 700 800 44 41 WhatsApp-نومەرى، سونداي-اق Facebook (حالىققا كومەك) جانە Instargam (halykkakomek) جەلىلەرى ارقىلى دا الۋعا بولادى.

ايتا كەتەيىك، وتكەن اپتادا «Nur Otan» پارتياسىنىڭ ءتوراعاسى نۇرسۇلتان نازاربايەۆ 2020 جىلدىڭ 17 تامىزى مەن 3 قازانى ارالىعىندا پرايمەريز وتكىزۋ تۋرالى قاۋلىعا قول قويعان بولاتىن.

پارتيا ءتوراعاسىنىڭ ءبىرىنشى ورىنباسارى باۋىرجان بايبەك اتاپ كورسەتكەندەي، پرايمەريزدىڭ نەگىزگى ماقساتى – الداعى ءماجىلىس پەن بارلىق دەڭگەيدەگى ءماسليحاتتار سايلاۋلارىنا پارتيالىق تىزىمدەردى قالىپتاستىرۋ ءۇشىن باسەكەلەس كۇرەس نەگىزىندە جاڭا كوشباسشىلاردى ايقىنداۋ.

پارتيا سايتىندا جاريالانعان پارتياىشىلىك ىرىكتەۋ وتكىزۋ ەرەجەسىنە سايكەس، پرايمەريز وتكىزۋ ارقىلى «مىقتى ليدەرلەر - مىقتى پارتيا» قاعيداتى بويىنشا شىنايى جانە مىقتى كوشباسشىلاردى پارتيا قاتارىنا تارتۋ، بەلسەندى جانە باستاماشىل ازاماتتار ءۇشىن «الەۋمەتتىك ليفت» قۇرۋ، ەلدى دامىتۋ ماسەلەلەرىن تالقىلاۋعا كوپشىلىكتى جۇمىلدىرۋ، ايماقتارداعى جۇيەلى جۇمىس ءۇشىن وزەكتى ماسەلەلەردى انىقتاۋ، سونداي-اق، كانديداتتاردىڭ جەكە جاۋاپكەرشىلىگىن ارتتىرۋ كوزدەلەدى.

ءوز كەزەگىندە ساياسي مەنەدجمەنت مەكتەبى پرايمەريزگە قاتىسۋشىلارعا ارنالعان «پرايمەريز. جاريا ساياسات. دەپۋتاتتىڭ بەينەسى قانداي بولۋى كەرەك؟» دەپ اتالاتىن وقۋ باعدارلاماسىنىڭ باستالاتىنى تۋرالى حابارلاندىرۋ جاريالادى.

سەمينارلاردا بەلگىلى ساياساتتانۋشىلار، مەملەكەتتىك جانە قوعامدىق قايراتكەرلەر، پسيحولوگتار سپيكەر رەتىندە ءسوز سويلەيدى. ولاردىڭ ىشىندە ەرمۇحامەت ەرتىسبايەۆ، ايدوس سارىم، راسۋل جۇمالى، اندرەي چەبوتاريەۆ، ساياسات نۇربەك جانە باسقالار بار.

وقىتۋ باعدارلاماسى ونلاين رەجيمدە وتەتىن ءتورت مودۋلدەن تۇراتىندىعى ايتىلدى. ولار: پارتياىشىلىك ىرىكتەۋ-پرايمەريزىن ىسكە اسىرۋ مەحانيزمى، پرايمەريزدى وتكىزۋدىڭ حالىقارالىق تاجىريبەسى، دەپۋتاتتىڭ بيلىكتەگى ءرولى مەن ورنى، دەپۋتاتتىڭ بەينەسى، يميدج جانە مىنەز-قۇلىقتىڭ ءتيىمدى ۇلگىسىن قالىپتاستىرۋ، ساياسي شەشەندىك.