اقش ادىلەت دەپارتامەنتى گارۆارد پروفەسسورى چارلز ليبەرگە فەدەرالدى ورگاندارعا قىتايداعى ۋحان تەحنولوگيالىق ۋنيۆەرسيتەتىندە جۇمىس ىستەگەنى تۋرالى  جالعان مالىمدەمە جاساعانىنا بايلانىستى رەسمي ايىپتاۋ ۇكىمىن جاريالادى. بۇل تۋرالى CNBC جازدى.

گارۆارد ۋنيۆەرسيتەتىنىڭ حيميا جانە حيميالىق بيولوگيا كافەدراسىنىڭ بۇرىنعى مەڭگەرۋشىسى، 61 جاستاعى دوكتور چارلز ليبەر قاڭتاردا تۇتقىندالىپ، بوستونداعى فەدەرالدى سوتقا شاقىرىلعان. جالعان مالىمدەمەلەر جاساعانى ءۇشىن پروفەسسورعا بەس جىلعا دەيىن باس بوستاندىعىنان ايىرۋ، ءۇش جىل باقىلاۋدا ۇستاۋ جانە 250 000 دوللار ايىپپۇل سالۋ قاراستىرىلعان.

– گارۆارد ۋنيۆەرسيتەتىنەن جاسىرىپ، 2011 جىلدان باستاپ ليبەر قىتايدىڭ ۋحان تەحنولوگيالىق ۋنيۆەرسيتەتىندە "ستراتەگيالىق عالىم" بولعان دەپ قارالۋدا" دەلىنگەن اقش ادىلەت دەپارتامەنتىنىڭ سەيسەنبىدەگى مالىمدەمەسىندە.

اقپاراتقا سايكەس ليبەر گارۆارد ۋنيۆەرسيتەتىنەن بولەك جاسىرىن تۇردە ۋحان تەحنولوگيا ۋنيۆەرسيتەتىندە جۇمىس ىستەگەن. ۋحان تەحنولوگيا ۋنيۆەرسيتەتى وعان ايىنا 50 مىڭ دوللار جالاقى تولەگەن جانە ونىڭ ءومىر ءسۇرۋ شىعىندارى ءۇشىن شامامەن 158 مىڭ دوللارداي قاراجات بەرىپ تۇرعان. سونداي-اق ۋنيۆەرسيتەتتە عىلىمي-زەرتتەۋ زەرتحاناسىن قۇرعانى ءۇشىن وعان 1،5 ميلليون دوللاردان استام قاراجات بولىنگەن. ال امەريكالىق پروفەسسور وندا جىلىنا كەمىندە توعىز اي جۇمىس ىستەۋگە مىندەتتەلگەن.

ايتا كەتەيىك، كەيبىر اقپارات كوزدەرى گارۆارد ۋنيۆەرسيتەتىنىڭ پروفەسسورى چارلز ليبەردىڭ قاماۋعا الىنۋى مەن جارعانات كوروناۆيرۋسىنىڭ زەرتحانادا جاسالۋىن بايلانىستىرادى. الايدا ول اقپاراتقا قامشى ءتىلشىسى فاكچەكينگ جاساپ، ونىڭ جالعان ەكەنىن انىقتاعان.