الماتى وبلىستىق سوتىندا 9 سۋديادان كوروناۆيرۋس انىقتالدى. بۇل تۋرالى وبلىستىق سوتتىڭ ءتوراعاسى ەلىس ءابدىقادىروۆ ايتتى.
– وكىنىشكە وراي، وبلىستىق سوتتىڭ توعىز سۋدياسىنان COVID-19 انىقتالدى. مەنىڭ ارىپتەستەرىم دارىگەرلەردىڭ باقىلاۋىندا، وقشاۋلانۋدا. ۆيرۋس تارالماس ءۇشىن الماتى وبلىستىق سوتىنىڭ عيماراتى كارانتينگە جابىلدى، وبلىستىق سوتتىڭ بارلىق قىزمەتكەرلەرى جەتى كۇنگە ءۇي كارانتينىنە الىندى. قىزمەتكەرلەردىڭ باسىم بولىگى قاشىقتان ونلاين جۇمىس ىستەپ جاتىر، – دەدى ە. ءابدىقادىروۆ.
ونىڭ ايتۋىنشا، سوتتىڭ بارلىق قىزمەتكەرلەرى 9 ماۋسىمدا كوروناۆيرۋسقا تەست تاپسىرعان.
– سوت وتىرىستارى قاشىقتان قارالىپ، سانيتارلىق-ەپيدەميولوگيالىق تالاپتار كۇشەيتىلدى. سوت عيماراتىنا بارۋعا تىيىم سالىنادى، بارلىق حات-حابارلار تەك ەلەكتروندى تۇردە قابىلدانادى، – دەپ اتاپ ءوتتى سوت ءتوراعاسى.
ەسكە سالا كەتەيىك، جوعارعى سوتتىڭ باسپا ءسوز قىزمەتىنىڭ جەتەكشىسى ايدوس ءسادۋاقاسوۆ كوروناۆيرۋس ينفەكسياسىن جۇقتىرعانداردىڭ اراسىندا سۋديالار دا بارىن جەلىدە جاريالاعان.
پىكىر قالدىرۋ