مەملەكەت جىلقى شارۋاشىلىعىمەن اينالىساتىن وتاندىق تاۋار وندىرۋشىلەرگە قولداۋ كورسەتۋدى جالعاستىرۋدا. بۇل تۋرالى ق ر اۋىل شارۋاشىلىعى مينيسترلىگى حابارلادى.
اتاپ ايتقاندا، ولارعا تومەندەگىدەي مۇمكىندىكتەر قاراستىرىلعان:
- ساتىپ الىنعان اسىل تۇقىمدى ايعىرلار ءۇشىن سۋبسيديالاۋ نورماسى ءار باسقا 100 مىڭ تەڭگەدەن؛
- بيە ءسۇتىن وندىرۋشىلەر ءۇشىن ءار ليترىنە 60 تەڭگەدەن؛
- اسىل تۇقىمدى جىلقىنىڭ انالىق باسىن باعۋعا، جەم-شوبىنە جىلىنا 20 مىڭ تەڭگەدەن؛
- جىلقى شارۋاشىلىعىن دامىتۋعا ارنالعان تەحنيكالار مەن جەم-شوپ دايىندايتىن جابدىقتاردى ساتىپ العاندا مەملەكەت 25 پايىزدىق وتەۋ ۇلەسىمەن ينۆەستيسيالىق سۋبسيديا بەرەدى؛
- نەسيەلەر مەن ليزينگ بويىنشا پايىزدىق مولشەرلەمەلەردى 10% سۋبسيديالاۋ.
بۇل جىلقى فەرمالارى مەن سالالىق قاۋىمداستىقتاردىڭ ۇسىنىستارى بويىنشا جاسالعان. 2019 جىلى 4،7 مىڭ جىلقى فەرماسى مەملەكەتتىك قولداۋ شارالارىمەن قامتىلدى.
سونىمەن قاتار، جىلقى وسىرۋشىلەرگە «جىلقى ساتىپ الۋعا» 10 جىلعا دەيىنگى جىلدىق ءوسىمى 6%-دى قۇرايتىن جەڭىلدەتىلگەن نەسيە بەرۋ قاراستىرىلعان.
2016 جىلدان بەرى «قۇلان» باعدارلاماسى جۇمىس ىستەپ كەلەدى.
2018 جىلى 12 مىڭ باس مال ساتىپ الۋعا 512 شارۋاشىلىق قاراجات الدى، بىلتىر 1440 شارۋاشىلىققا 40 مىڭنان استام جىلقى ساتىپ الۋعا جەڭىل نەسيە بەرىلگەن. 2020 جىلى قارجىلىق قولداۋ الۋشىلاردىڭ سانى ەداۋىر ارتادى دەپ كۇتىلۋدە.
پىكىر قالدىرۋ