جەزقازعان ايماقتىق "Saryarqa" گازەتىنىڭ باس رەداكتورى، "سارىارقا" باستاۋىش پارتيا ۇيىمىنىڭ ءتوراعاسى دارحان مۇحان Nur Otan پارتياسىنىڭ پرايمەريزىنە قاتىساتىنىن حابارلادى. بۇل تۋرالى ول ءوز Facebook پاراقشاسىندا جازبا قالدىردى.
وسى جەردە "پرايمەريز نە بەرەدى؟"، "قانداي ارتىقشىلىقتارى بار؟" دەگەن سۇراقتاردىڭ جاۋابى دا وزىنەن-وزى تۇسىنىكتى بولعان سياقتى.
بىرىنشىدەن، پارتيا مۇشەلەرى سايلاۋعا كىمدەر كانديدات بوپ قاتىساتىنىن ءبىلىپ قانا قويمايدى، ولاردى ىرىكتەۋگە اتسالىسادى. باعدارلامالارىمەن تانىسادى، كانديداتتىڭ مۇمكىندىكتەرىن، ءومىر جولى مەن تاجىريبەسىن زەرتتەي الادى.
ەكىنشىدەن، پرايمەريز كەزىندە كانديداتتىڭ، پارتيانىڭ باعدارلاماسىن جاريا تۇردە ازىرلەۋ مۇمكىندىگى تۋادى. پرايمەريزگە قاتىسقان ءار ازاماتتىڭ ۇسىنىستارى بولاشاقتا پارتيا فراكسيالارى باسشىلىققا الاتىن نەگىزگى قۇجاتقا اينالادى.
ۇشىنشىدەن، سايلاۋعا قاتىسۋ بەلسەندىلىگىنە دە پرايمەريز وڭ اسەر ەتۋى ءتيىس. ويتكەنى، كانديداتتاردى ىرىكتەۋگە قاتىسقان ادام، سايلاۋدا ءوز كانديداتى ءۇشىن داۋىس بەرۋگە تىكەلەي مۇددەلى بولادى عوي.
بىزدە تەك رەسپۋبليكا دەڭگەيىندە عانا ەمەس، ايماقتاردا دا وزەكتى ماسەلەلەر، ءار سالادا جاڭا ادىس-تاسىلدەردى تالاپ ەتەتىن قيىندىقتار جوق ەمەس. ۋاقىت ءماسليحاتتارعا جاڭا مىندەت ارتىپ وتىر. الداعى سايلاۋدا جەرگىلىكتى وكىلدىك ورگانداردىڭ قۇرامى بارىنشا جاڭارۋى، وعان جاڭا ادامدار ءوتۋى كەرەك دەپ سانايمىن. ءماسليحات دەپۋتاتى بولام دەگەن ادام بۇرىنعىشا ءوز كانديداتۋراسىن ۇسىنا سالمايدى، فيليال توراعاسىمەن، نە اكىممەن جاقسى قارىم-قاتىناستا بولۋى دا جەتكىلىكسىز. ەندى بولاشاق كانديداتتار ءوز ۇستانىمدارىن، باعدارلامالارىن اشىق باسەكەلەستىك جاعدايىندا كوپشىلىككە تانىستىرىپ، جاقتاستار جيناۋى قاجەت. وسى جەردە Nur Otan پارتياسىنىڭ پارتياعا مۇشە ەمەس ازاماتتارعا دا كانديدات رەتىندە پرايمەريزگە قاتىسۋ مۇمكىندىگىن ۇسىنىپ وتىرعانى قوعامنىڭ دامۋى ءۇشىن وڭ قادام ەكەنىن اتاپ وتكەن ءجون. بۇل – پارتيا دا جاڭارۋعا، قوعام ءۇنىن تىڭداۋعا تۇبەگەيلى بەت بۇردى دەگەن ءسوز.
بۇيىرتسا، پرايمەريزگە قاتىسىپ، ايماقتىق دەڭگەيدەگى ماسەلەلەرگە بايلانىستى دەباتقا ءتۇسۋ، سول ارقىلى ساياسي تاجىريبە جيناۋ ويىمىزدا. ءساتىن سالىپ، باعىمىز جانىپ جاتسا ونى دا كورەرمىز. باستىسى – سىرتتان باقىلاۋشى بولۋمەن شەكتەلمەي، ۇلكەندى-كىشىلى ماسەلەلەردى شەشۋگە تىكەلەي ارالاسۋ" دەلىنگەن جازبادا.
پىكىر قالدىرۋ