ەلوردادا سوڭعى كۇندەرى كوروناۆيرۋس ينفەكسياسىنان ءتورت ادام ايتىس بولدى، دەپ حابارلادى قالا اكىمدىگىنىڭ رەسمي سايتى.

نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باستىعى ساۋلە قيسىقوۆانىڭ ايتۋىنشا، ىندەتتەن كوز جۇمعان مارقۇمداردىڭ ءبىرى ۇيدە وزدىگىنەن ەمدەلگەن.

– 47 جاستاعى تۇرعىن ەكى اپتا بويى ۇيدە ءوزى ەمدەلگەن. ەكىنشى جاعدايدا، نۇر-سۇلتان قالاسىنىڭ تۇرعىنى 68 جاستاعى ەر ادام جەدەل جاردەممەن اۋرۋحاناعا جەتكىزىلدى. ءۇشىنشى جاعدايدا بقو-نىڭ تۇرعىنى، 70 جاستاعى ەر ادام جۇرەكتىڭ يشەميالىق اۋرۋى، ارتەريالىق گيپەرتەنزيا جانە سوزىلمالى جۇرەك جەتكىلىكسىزدىگى دياگنوزىمەن كارديولوگتىڭ باقىلاۋىندا بولدى. ءتورتىنشى جاعدايدا 59 جاستاعى ەر ادام، الماتى قالاسىنىڭ تۇرعىنى وزدىگىنەن اۋرۋحاناعا جۇگىنگەن. ولاردىڭ بارلىعى جاعدايىنىڭ اۋىرلىعىنا بايلانىستى دەرەۋ جانساقتاۋ بولىمىنە جاتقىزىلدى، – دەدى س.قيسىقوۆا.

دەنساۋلىق ساقتاۋ باسقارماسىنىڭ باسشىسى ەلوردا تۇرعىندارىنا ۇندەۋ جاسادى.

– كوروناۆيرۋس پاندەمياسى ارتتا قالدى جانە ونىمەن بايلانىستى ءقاۋىپ سەيىلدى دەپ ايتۋعا بولمايدى. ويتكەنى، بۇقارالىق شارالاردىڭ بارلىق قاتىسۋشىلارى جاقىندارى ءۇشىن ينفەكسيانىڭ بەلسەندى كوزى جانە جاڭا ينفەكسيا وشاقتارىنىڭ پايدا بولۋ ءقاۋپىن تۋعىزادى، – دەدى س.قيسىقوۆا.

ايتا كەتەيىك، نۇر-سۇلتاندا كوروناۆيرۋس پاندەمياسى باستالعالى 2620 ادام ۆيرۋس جۇقتىرعان. ونىڭ 270ء-سى بالالار. 1 829 ادام نەمەسە ناۋقاستاردىڭ 70%-ى ەمدەلىپ شىقتى.