ق ر پرەمەر-مينيسترى اسقار مامين جامبىل وبلىسىندا  قورداي اۋدانىنىڭ گۆاردەيسكيي قالا ۇلگىسىندەگى كەنتىندە ق ر بعم عىلىم كوميتەتىنىڭ بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى (عزي) جانىنداعى ۆاكسينا شىعاراتىن بيوفارماسيەۆتيكالىق زاۋىتتىڭ قۇرىلىسىن باستاپ بەردى. 

زاۋىت ءتيىستى وندىرىستىك تاجىريبەنىڭ (GMP) حالىقارالىق ستاندارتى بويىنشا يممۋنوبيولوگيالىق دارى-دارمەكتەر، ونىڭ ىشىندە كوروناۆيرۋس ينفەكسياسىنا قارسى ۆاكسينا شىعاراتىن بولادى. قازىرگى تاڭدا قازاقستان عزي-نىڭ COVID-19-عا قارسى كانديداتتىق ۆاكسيناسى ددسۇ تىزىمىنە ەنگىزىلگەن جانە كلينيكاعا دەيىنگى سىناقتان ءساتتى ءوتىپ جاتىر.

سونداي-اق كاسىپورىندا پاندەميالىق تۇماۋعا، تۋبەركۋلەزگە، برۋسەللەزگە، نودۋليارلىق دەرماتيتكە، ۇساق كۇيىس قايىراتىن جانۋارلار وباسىنا، قوي مەن ەشكىنىڭ كونتاگيوزدى ەكتيماسىنا، قوي شەشەگىنە، قۇتىرماعا جانە باسقا دا جۇقپالى اۋرۋلارعا قارسى ۆاكسينالار شىعارىلادى.

قۇرىلىس جۇمىستارىن بيىل جەلتوقسان ايىندا اياقتاۋ جانە جىل سايىن بيوفارماسيەۆتيكالىق پرەپاراتتاردىڭ 60 ملن دوزاسىنا دەيىن ءوندىرۋ كوزدەلگەن.

ق ر بعم عىلىم كوميتەتىنىڭ بيولوگيالىق قاۋىپسىزدىك ماسەلەلەرى عزي 1958 جىلى كسرو-نىڭ 6 ءىرى ۆيرۋسولوگيالىق ينستيتۋتىنىڭ ءبىرى رەتىندە قۇرىلدى. شتات 214 عىلىمي قىزمەتكەر مەن جەتەكشى ۆيرۋسولوگ-عالىمداردان (اكادەميكتەر، دوكتورلار جانە عىلىم كانديداتتارى، PhD) قۇرالعان، ءقاۋىپتى ينفەكسيالارمەن جۇمىس ىستەۋگە ارنالعان 13 زەرتحانانى قامتيدى.

قازىرگى ۋاقىتتا عزي 5 زەرتحانا بازاسىندا وتاندىق ۆاكسينالاردىڭ 67 ءتۇرىن ءوندىردى، ونىڭ ىشىندە، دەنساۋلىق ساقتاۋ سالاسى ءۇشىن جوعارى پاتوگەندى قۇس تۇماۋىنا قارسى (الەمدە 7) جانە جوعارى پاتوگەندى شوشقا تۇماۋىنا قارسى (الەمدە 6)، اۋىل شارۋاشىلىعى سالاسى ءۇشىن قۇس تۇماۋىنا قارسى (الەمدە العاشقىلاردىڭ ءبىرى)، برۋسەللەزگە قارسى جاڭا ۆەكتورلىق ۆاكسينا (الەمدىك انالوگتاردان اسىپ تۇسەدى). وسى جىلى اۋسىلعا قارسى ۆاكسينا جانە 4 سوVID-19-عا قارسى ۆاكسينا ازىرلەنۋدە.