شىعىس قازاقستانداعى الاكول جاعالاۋىن اباتتاندىرۋ جۇمىستارى جالعاسۋدا. 2016 جىلدان باستاپ وسى ماقساتتا 6،2 ملرد تەڭگە جۇمسالدى. بيىل بۇل باعىتقا تارتىلعان ينۆەستيسيا كولەمى 3،9 ملرد. تەڭگەنى قۇراپ وتىر.

كول جاعالاۋىنىڭ ينفراقۇرىلىمى ۇنەمى جاقسارىپ، الەمنىڭ 10-ۇزدىك ەلدەرىنىڭ ءتۋريزمىنىڭ كارتاسىنا ەنگىزىلدى.

كاسىپكەرلەر قىزمەت كورسەتۋ ساپاسىن زامان تالابىنا ساي ورىنداماي وتىر. ايماق باسشىسى دانيال احمەتوۆ ارباتتى ارالاپ، جاعالاۋدىڭ باس كوشەسىندەگى قۇرىلىسقا ەسكەرتۋ جاسادى.

– ءبىز اۋقىمدى اباتتاندىرۋ جۇمىستارىن جۇرگىزىپ جاتىرمىز. وتكەن جىلمەن سالىستىرعاندا، مۇندا ورىن العان وزگەرىستەر كوپ. ءبىراق مەن ءارقاشان كاسىپكەرلەرگە كوڭىل اۋدارىپ، بىزگە مۇندا تۋريست رەتىندە كەلەتىن قازاقستاندىقتارعا باسقاشا دەڭگەيدە قىزمەت كورسەتۋ كەرەكتىگىن ايتامىن. بيزنەسمەندەر تۇرىك جاعالاۋلارىمەن باسەكەلەس بولىپ،  قىزمەت كورسەتۋ ساپاسىن الەمدىك ستاندارتتارعا سايكەس جۇرگىزۋى ءتيىس. تاماقتانۋ سالاسىمەن اينالىساتىن كاسىپكەرلەر مول پايدا تابادى. سوعان قاراماستان جوعارى تالاپقا سايكەس كەلەتىن بىردە-بىر مەيرامحانا نەمەسە كافە جوق. الايدا مۇنداي تاماقتانۋ ورىندارى ورتالىقتا ورنالاسقان. ولار اباتتاندىرۋ تۋرالى، قىزمەت كورسەتۋ ساپاسى جونىندە ويلانبايدى. ويتكەنى ولار ادامداردىڭ ءبارىبىر وزدەرىنە كەلەتىنىن بىلەدى، – دەدى شقو اكىمى.

ايماق باسشىسى ارباتتاعى قۇرىلىس تالاپتارىنا سايكەس كەلمەيتىن دۇڭگىرشەكتەردى الىپ تاستاۋدى تاپسىردى.

ەستەرىڭىزگە سالا كەتەيىك، 10 ماۋسىمعا دەيىن بىردە-بىر دەمالىس ورنى كەلۋشىلەردى كۇتىپ الۋعا دايىن دەگەن اكتىنى العان جوق. مۇنداعى 175 دەمالىس ورنىنىڭ 103 ءالى كۇنگە دەيىن تۋريستەردى قابىلداپ الۋعا دايىندىقتى باستاعان جوق.

كول جاعالاۋىندا 345 كاسىپكەرلىك نىسان بار. ونىڭ ىشىندە 11،5 مىڭ توسەك-ورىندىق 175 دەمالىس ءۇيى، 36 قوعامدىق تاماقتانۋ ورنى، 27 دۇكەن، 104 دۇڭگىرشەك، 3 ءدارىحانا بار.

اعىمداعى جىلى 8 دەمالىس ورنى سالىندى. ال 11ء-ى اۋماعىن كەڭەيتتى. ءسويتىپ، قوسىمشا 650 توسەك-ورىندىق پايدا بولدى.

سونداي-اق 200 ورىندىق «Alakol love» تۋريستىك كەشەنىنىڭ قۇرىلىسى باستالدى. بۇدان بولەك «جۇمىسپەن قامتۋدىڭ جول كارتاسى» باعدارلاماسى بويىنشا ەكى جوبا قولعا الىندى. جوبا اياسىندا سۋ جانە ەلەكتر جەلىلەرى تارتىلادى.

جالپى اۋماعى 2،5 شاقىرىمدى قۇرايتىن ۆەلوجول مەن 5 جاڭا ءمودۋلدى ساۋدا پاۆيلوندارىنىڭ قۇرىلىسى اياقتالدى. بيىل كول جاعالاۋىندا جاڭا تۋالەتتەر، كيىنۋگە ارنالعان كابينالار، قۇتقارۋشى بەكەتتەرى سالىنادى.

كەلۋشىلەردىڭ دەمالىسىن قىزىقتى وتكىزۋ ماقساتىندا ساحنا، بي جانە اكۆاساياجاي بوي كوتەرەدى.

– ءۇرجارداعى اۋەجايدا قايتا جوندەۋ جۇمىستارى جۇرگىزىلەدى. ۇشۋ-قونۋ جولاعى ۇزارتىلادى. بۇل ءوز كەزەگىندە كەز كەلگەن ۇشاقتىڭ مۇندا ۇشىپ كەلۋىنە مۇمكىندىك بەرەدى. وسى باعىتتاعى جۇمىستار كەلەر جىلدىڭ سوڭىنا دەيىن جۇزەگە اسىرىلادى. سونداي-اق بىزگە ءۇرجار اۋىلىن اباتتاندىرۋ دا ماڭىزدى. ويتكەنى بۇل جەر كۋرورتتىق ورىننىڭ استاناسى.ءۇرجاردى اباتتاندىرۋعا 2،2 ملرد تەڭگە بولىنەدى. ءۇش جىلدان كەيىن ءۇرجاردى باسقا جاعىنان كورەتىن بولاسىزدار، – دەدى دانيال احمەتوۆ كاسىپكەرلەرمەن كەزدەسۋ بارىسىندا.

شقو اقپارات ورتالىعى