ورتالىقتا مۇمكىندىگى شەكتەۋلى بالالارى بار انالار تىگىن اتەلەسى، ماسساج، مانيكيۋر كابينەتتەرىندە، شاشتاراز، پوليگرافيادا جۇمىس ىستەيتىن بولادى، دەپ حابارلايدى ەلوردا اكىمدىگىنىڭ رەسمي سايتى.

انالار بيىل مامىردا «باقىتتى شاڭىراق» قورىن اشتى. وسىنداي بىرەگەي ورتالىقتى قۇرۋ تۋرالى باستامانى اكىمدىك پەن مەسەناتتار قولدادى. ولارعا ارنايى ورىن ءبولىنىپ، قاجەتتى جابدىقتار بەرىلدى.

«انالار ۇزاق ۋاقىت بويى جۇمىس ىستەپ، ءوز مۇمكىندىكتەرىن تولىق اشۋدى ارماندادى. ورتالىقتا شەبەرلىك سىنىپتارى وتەتىن بولادى. مەنىڭ بارلىق انالار وز-وزىنە دەگەن سەنىمىن جوعالتپاي، رۋحى بيىك بولسا دەگەن تىلەگىم بار»، – دەيدى «باقىتتى شاڭىراق» قق ءتورايىمى پەرنەش ابدىكارىموۆا.

ورتالىقتىڭ اشىلۋ سالتاناتىنا نۇر-سۇلتان قالاسى اكىمىنىڭ ورىنباسارى باقتيار ماكەن قاتىستى.

«وتكەن جىلدان باستاپ ءبىز انالار يدەياسىن قالاي جۇزەگە اسىرۋعا بولاتىنىن ويلادىق. ءبىزدى مەسەناتتار قولداعانى قۋانتتى. ورتالىقتا 13 ءتۇرلى قىزمەت كورسەتىلەتىن بولادى. جالپى قالادا ەرەكشە بالا تاربيەلەپ وتىرعان بەس مىڭعا جۋىق انا بار. ولاردىڭ ءارقايسىسىنىڭ ءوز قابىلەتى بار. قالادا وسىنداي ورتالىقتار كوپ بولادى. جوسپارلار وتە كوپ. ارينە، باستامانى اتا-انالار باستاۋ كەرەك. ال ولاردى جۇزەگە اسىرۋ قالا باسشىلىعى مەن مەسەناتتاردىڭ قولىندا. مەملەكەت تاراپىنان مۇمكىندىگى شەكتەۋلى بالالاردى باعىپ وتىرعان وتباسىلارعا قولداۋ كورسەتىلىپ كەلەدى. اكىمدىك بۇل رەتتە جۇيەلى جۇمىس ىستەۋدە. وڭالتۋ ورتالىقتارى، ينۆاتاكسيلەر كوبەيىپ، جۇمىسقا ورنالاستىرۋ ماسەلەلەرى شەشىلۋدە»، – دەپ اتاپ ءوتتى باقتيار ماكەن.

رەگينا بوتسمان ەكى بالا تاربيەلەپ وتىر. ەكى بالانىڭ اناسى مۇنداي مۇمكىندىكتىڭ بولعانىنا وتە قۋانىشتى.

«مەن ۆيزاجيست شەبەر بولىپ جۇمىس ىستەيمىن. سانكت-پەتەربۋرگتە وقىدىم. بولاشاقتا بۇل ماعان ودان ءارى ءوسۋ ءۇشىن پايدالى دەپ ويلايمىن. بىزدە بالالارعا ۋاقىت ءبولۋ ءۇشىن جۇمىس كەستەسى ەركىن تارتىپتە جاسالعان. ءبىزدىڭ ءارقايسىمىز ءوز ماقساتتارىمىزعا قول جەتكىزگىمىز كەلەدى، ءبىراق بالالارىمىزدىڭ دياگنوزىنا بايلانىستى ءبىز ۇيدە وتىرۋعا ءماجبۇرمىز. ال ءقازىر ءبىزدىڭ ارماندارىمىز جۇزەگە استى. ورتالىقتىڭ اشىلۋىنا جانىمىزدى سالدىق»، – دەيدى ر.بوتسمان