داۋلى كاشمير ايماعىنداعى لاداكا ەلدى-مەكەنىندەگى اسكەري قاقتىعىس كەزىندە جۇڭگو اسكەرلەرى قولىنان 3 ءۇندى ساربازى قازا تاپتى، دەپ جازدى Zakon.kz.
ءقازىر ەكى جاقتىڭ اسكەري شەنەۋنىكتەرى جاعدايدى رەتتەۋ ءۇشىن كەلىسسوز جۇرگىزىپ جاتىر.
جۇڭگو ءسىم وكىلى چجاو ليسزياننىڭ ايتۋىنشا، 15 ماۋسىمدا ءۇندى اسكەري كۇشتەرى كەلىسىمدى ورەسكەل بۇزعان. زاڭسىز ارەكەتتەرگە بارىپ، ەكى رەت شەكارادان وتكەن. جۇڭگو اسكەرلەرىن قولىنا قارۋ الۋعا ماجبۇرلەپ، ارانداتقان. سونىڭ سالدارىنان بۇل جايت قوس تاراپتىڭ اسكەري قاقتىعىسىنا اكەلىپ سوققان. قاقتىعىس ەكى ەل اراسىنداعى شيەلەنىس جاعدايىندا بولدى.
ءۇندىستان بۇعان دەيىن قىتايدى "لاداك القابىنا مىڭداعان اسكەر جىبەردى" دەپ ايىپتاعان. ءۇندىستاندىق اسكەريلەردىڭ ءولىمى سوڭعى ەكى ونجىلدىقتاعى قوس دەرجاۆانىڭ قاراما-قايشىلىعى ۋشىققاندا تۋىنداعان العاشقى وقيعا دەپ سانالادى. وسى ۋاقىتقا دەيىن 1962 جىلى ءۇندىستان جەڭىلىسكە ۇشىراعان كەزدە ەكى ەل اراسىندا تەك ءبىر رەت سوعىس بولدى.
جۇڭگو مەن ءۇندىستاننىڭ اراسىندا كاشميردىڭ سولتۇستىگىندەگى تاۋلى ايماققا، سونداي-اق ارۋناچال-پرادەشتىڭ سولتۇستىك-شىعىس شتاتىندا 60 مىڭ شارشى شاقىرىمعا يەلىك ەتۋ تۋرالى ۇزاق ۋاقىتتان بەرى اۋماقتىق داۋ بار. ناقتى باسقارۋ جۇيەسى لاداك ايماعىنا تيەسىلى. 1962 جىلدىڭ كۇزىندە بۇل داۋ شەكارا سوعىسىنا ۇلاسىپ كەتتى.
1993 جانە 1996 جىلدارى جۇڭگو مەن ءۇندىستان داۋلى اۋدانداردا بىتىمگەرلىك كەلىسىمگە قول قويدى. سوڭعى جىلدارى ەكى ەل اراسىنداعى ەڭ ءىرى قاراما-قايشىلىق 2017 جىلدىڭ جازىندا بولدى. بۇل كەزدە قىتايدان كەلگەن جۇمىسشىلار جۇڭگو، ءۇندىستان جانە بۋتان شەكارالارىنىڭ جاقىن ماڭداعى تاۋلى ايماقتا ورنالاسقان دوكلام ءۇستىرتىنىڭ ۇستىنەن تاسجول سالا باستادى. سودان كەيىن بۋتان بيلىگى نارازىلىق ءبىلدىردى، بۇنى جۇڭگو جاعى ەلەمەدى. وسىدان كەيىن ءۇندىستان بۇل ماسەلەگە ارالاستى: ونىڭ اسكەرلەرى مەملەكەتتىك شەكارادان ءوتىپ، قىسقا قاقتىعىستاردان كەيىن قحر اسكەري كۇشتەرىن ۇستىرتتەن اكەتكەن. بىرنەشە ايدان كەيىن، ءبىرقاتار كەڭەستەردەن كەيىن ءۇندىستان مەن قىتايدىڭ سىرتقى ىستەر ورگاندارى دوكلامدا اسكەري كۇشتەردى ورنالاستىرۋ تۋرالى كەلىسىمگە كەلگەندەرىن مالىمدەدى.
