الماتى قالاسى اكىمى باقىتجان ساعىنتايەۆ اۋەزوۆ اۋدانىنا جۇمىس ساپارى بارىسىندا اۋدان تۇرعىندارىنىڭ بالاباقشا مەن مەكتەپتە ورىن تاپشىلىعى، اباتتاندىرۋ جانە جۇمىس ورىندارىمەن قامتاماسىز ەتۋ جونىندەگى وتىنىشتەرىن شەشۋ جولدارىمەن تانىستى.

اۋەزوۆ اۋدانىنىڭ تۇرعىندارى كوتەرگەن ەڭ وزەكتى ماسەلەنىڭ ءبىرى –مەكتەپتەردەگى ورىن تاپشىلىعى. بۇگىنگى كۇنى اۋداندا 5365 ورىن جەتىسپەيدى. 6 مىڭعا جۋىق ادام تۇراتىن مامىر ىقشاماۋدانىندا 1200 ورىندىق مەكتەپ سالىنۋدا. ب. ساعىنتايەۆ قۇرىلىس الاڭىن ارالاپ كوردى جانە قولدانىلاتىن قۇرىلىس ماتەريالدارىنىڭ ساپاسىن، قۇرىلىس جۇمىستارىنىڭ بارىسىن قاتاڭ باقىلاۋعا الۋدى تاپسىردى. جاڭا وقۋ جىلىندا سالىنىپ جاتقان وسى مەكتەپتى جانە اقساي-3ا ىقشاماۋدانىنداعى №123 مەكتەپ جانىنداعى 400 ورىندىق قوسالقى نىساندى پايدالانۋعا بەرۋ جوسپارلانعان.

بۇلاردان وزگە، اعىمداعى جىلى بەس مەكتەپ جانىنان جالپى سىيىمدىلىعى 3550 ورىندىق قوسالقى نىسانداردىڭ قۇرىلىستارى باستالادى. ولار – №6 مەكتەپ ىرگەسىنە سالىناتىن 900 ورىندىق، №117 مەكتەپ قاسىنا سالىناتىن 900 ورىندىق، №133 مەكتەپ جانىنان بوي كوتەرەتىن 400 ورىندىق، №132 مەكتەپ ىرگەسىنە سالىناتىن 800 ورىندىق جانە №121 مەكتەپ قاسىنان سالىناتىن 550 ورىندىق نىساندار. وسىلايشا، اۋەزوۆ اۋدانىندا مەكتەپتەردەگى ورىن تاپشىلىعى ءىس جۇزىندە وڭ شەشىمىن تاباتىن بولادى.

جالپى، قالا بويىنشا مەكتەپتەردە 30 مىڭ ورىن جەتىسپەيدى. حالىقتىڭ سانى وسۋىنە وراي كەلەر وقۋ جىلىندا بۇل كورسەتكىش ەكى ەسەگە ارتاتىن بولادى. سوندىقتان 2020-2021 جىلدارى 16 جاڭا مەكتەپ جانە 23 قوسالقى نىسان سالۋ جوسپارلانعان، بۇلاردا شامامەن 47،5 مىڭى ورىن بولادى. ياعني، وقۋشى ورنىنىڭ تاپشىلىعى 80 پايىزعا قىسقارادى. قۇرىلىس جقجك، ءمجا باعدارلامالارى مەن جوبالارى جانە بيزنەستىڭ الەۋمەتتىك جاۋاپكەرشىلىگى بويىنشا ءارى جەكە كاسىپكەرلىكتى ىنتالاندىرۋ ارقاسىندا قارقىندى جۇرۋدە.

بالاباقشالارداعى ورىن تاپشىلىعى ماسەلەسىن شەشۋگە تۇرعىن كەشەندەرىن سالۋمەن اينالىساتىن كاسىپكەرلەر كومەكتەسۋدە. الماتى قالاسى اكىمىنىڭ تاپسىرماسى بويىنشا تك سالۋ كەزىندە الەۋمەتتىك نىساندار ءۇشىن ورىندار ءبولۋ مىندەتتى تۇردە قاراستىرىلۋى ءتيىس. بۇل ءبىلىم بەرۋدىڭ قالالىق مەكەمەلەرىنە تۇسەتىن جۇكتەمەنى ازايتۋعا سەپتىگىن تيگىزەدى. «ءۇش سۇڭقار» تك اقساي-5 ىقشاماۋدانىندا قۇرىلىس سالىپ جاتقان كومپانيا 115 ورىندىق بالاباقشا ءۇشىن ارنايى ورىن ءبولدى.

اۋداندا 16 584 بالانى قامتيتىن 46 مەملەكەتتىك جانە 122 جەكە بالاباقشا بار. مەملەكەتتىك تاپسىرىس بويىنشا 63 جەكە بالاباقشا جۇمىس جاساۋدا. 2019 جىلى مەملەكەتتىك (120 ورىندىق) جانە 25 جەكە بالاباقشا (400 ورىندىق) پايدالانۋعا بەرىلگەن بولاتىن.

2020 جىلى توعىز جەكە بالاباقشانى اشۋ جوسپارلانعان، بۇگىنگى كۇنى ولاردىڭ ۇشەۋى (178 ورىندىق) اشىلدى.