«Nur Otan» پارتياسىنىڭ ساياسي مەنەدجمەنت مەكتەبى پارتياىشىلىك پرايمەريزدىڭ الەۋەتتى ۇمىتكەرلەرىنە ارنالعان العاشقى ونلاين-سەمينارىن  وتكىزدى. ەلدەگى جەتەكشى ساياسي پارتيانىڭ پاۆلودار مەن قوستاناي وبلىستارىنداعى 300-دەن استام مۇشەسى بەلگىلى مەملەكەت قايراتكەرى ەرمۇحامەت ەرتىسبايەۆ، قوعامدىق ساياسات ينستيتۋتىنىڭ ديرەكتورى يۋليا كۋچينسكايا، كوۋچەر جانەل سارييەۆا جانە جۋرناليست عازيزا رايىمبەكپەن بىرگە بەينەكونفەرەنسيا بايلانىسى ارقىلى وتكەن ءىس-شاراعا قاتىستى.

پارتيالىقتارمەن وتكەن ۆەبينار بارىسىندا ەرمۇحامەت ەرتىسبايەۆ بارلىق ۋاقىتتا دا شىندىقتى ايتۋ  – دەپۋتات ءۇشىن ەڭ ماڭىزدى قاسيەت ەكەنىن اتاپ ءوتتى. ونىڭ پىكىرىنشە، حالىق قالاۋلىسى ءوز سايلاۋشىلارىنىڭ ءومىرىن جاقسى جاققا قاراي  وزگەرتۋ ءۇشىن قولىنان كەلگەنىنىڭ ءبارىن ىستەۋگە ءتيىس. ءبىراق حالىقپەن تۇراقتى اشىق بايلانىس ورناتىلماسا، جۇمىس جەمىستى بولمايدى، دەپ ەسەپتەيدى سپيكەر. 

سونداي-اق ول «Nur Otan» پارتياسىنداعى حالىق قالاۋلىلارىنىڭ بارلىق جەردە شىن ماعىناسىنداعى ناعىز حالىقتىڭ ليدەرلەرى بولا ءبىلىپ، ەل ءۇمىتىن اقتاپ، قالىڭ بۇقارانى سوڭىنان ەرتىپ اكەتە الۋى كەرەك ەكەنىنە توقتالدى.

– ءقازىر ايماقتىق ليدەرلەردىڭ ۋاقىتى تۋدى، سىزدەردىڭ ءارقايسىڭىز اۋداننىڭ، قالانىڭ، وبلىستىڭ ليدەرلەرىنە اينالىپ، ادامداردى ءوز ماڭايلارىڭا توپتاستىرا بىلۋلەرىڭىز كەرەك. بۇل – جاڭا ساياسي ترەند، – دەدى ەرمۇحامەت ەرتىسبايەۆ.

پارتياىشىلىك ىرىكتەۋدى وتكىزۋدىڭ ەرەجەلەرى مەن پرايمەريزدىڭ مەحانيزمى تۋرالى قوعامدىق ساياسات ينستيتۋتىنىڭ ديرەكتورى يۋليا كۋچينسكايا اڭگىمەلەپ بەردى. سپيكەر پرايمەريز وتكىزۋ كەزەڭىندەگى ۇگىت-ناسيحات جۇمىسىنا باسا نازار اۋداردى. ءوز كەزەگىندە كوۋچەر جانەل سارييەۆا جەكە باسىنىڭ بەدەلىن قالىپتاستىرۋداعى تاجىريبەسىن ايتىپ بەرسە، جۋرناليست عازيزا رايىمبەك  شەشەندىك شەبەرلىكتىڭ قۇپياسى تۋرالى ويىمەن ءبولىستى.

ۆەبيناردى ۇيىمداستىرۋشىلاردىڭ ايتۋىنشا، كۇندەلىكتى تۇرمىستا پايدالانۋدا داعدى بولىپ كەتكەن قالىپتى شەشىمدەر ءقازىر جۇمىس ىستەمەيدى.

– كوپشىل تۇلعانىڭ قانداي بەينەسى ءسىزدى تابىستى ساياساتكەر ەتەدى، ال قايسىسى ونداي ەتە المايدى، بۇل تۋرالى سىزدەر ءبىزدىڭ سەمينارىمىزدان بىلە الاسىزدار، – دەدى ساياسي مەنەدجمەنت مەكتەبى ديرەكتورىنىڭ ورىنباسارى ساۋلە باقتىمبەت.

ەسكە سالا كەتەيىك، ەلباسى، «Nur Otan» پارتياسىنىڭ ليدەرى نۇرسۇلتان نازاربايەۆ بيىلعى 17 تامىزدان 3 قازانعا دەيىنگى ارالىقتا پرايمەريز وتكىزۋ تۋرالى قاۋلىعا قول قويعان بولاتىن.

پرايمەريزدىڭ باستى ماقساتى – الداعى بولاتىن ءماجىلىس پەن بارلىق دەڭگەيدەگى ءماسليحاتتار سايلاۋىنا پارتيالىق تىزىمدەردى ودان ءارى قالىپتاستىرۋ ءۇشىن باسەكەلەستىك كۇرەس نەگىزىندە جاڭا ليدەرلەردى انىقتاۋ.

جاڭا پىشىندەگى پارتياىشىلىك ىرىكتەۋگە ءار پارتيالىقتىڭ قاتىسۋ مۇمكىندىگى قاراستىرىلعان. ساياسي مەنەدجمەنت مەكتەبىنىڭ ونلاين-سەمينارلارى بيىلعى 7 تامىزدا اياقتالادى.

بەلگىلى ساياساتتانۋشىلار، مەملەكەت جانە قوعام قايراتكەرلەرى، پسيحولوگتار مەن جاتتىقتىرۋشىلار ۆەبيناردىڭ سپيكەرلەرى بولادى، ولاردىڭ ىشىندە ەرمۇحامەت ەرتىسبايەۆ، ايدوس سارىم، راسۋل جۇمالى، اندرەي چەبوتاريەۆ، ساياسات نۇربەك جانە باسقالارى بار.

وقىتۋ باعدارلاماسى ءتورت مودۋلدەن تۇرادى: پارتياىشىلىك ىرىكتەۋ - پرايمەريزدى ىسكە اسىرۋدىڭ مەحانيزمى، پرايمەريز وتكىزۋدىڭ حالىقارالىق تاجىريبەسى، بيلىكتەگى دەپۋتاتتىڭ ءرولى مەن ورنى، دەپۋتاتتىڭ بەينەسى، يميدج بەن مىنەز-قۇلىقتىڭ ءتيىمدى مودەلىن جاساۋ جانە ساياسي ريتوريكا. سونىمەن قاتار ينتەراكتيۆتى تالقىلاۋ، توپتاردا پراكتيكالىق جاتتىعۋلار مەن شىعارماشىلىق تاپسىرمالاردى ورىنداۋ قاراستىرىلعان.

ساباقتار بارلىق تىلەك ءبىلدىرۋشى پارتيالاستار ءۇشىن تەگىن جۇرگىزىلەدى.