كيم چەن ىننىڭ قارىنداسى وڭتۇستىك كورەياعا قارسى اسكەري قيمىلدار جوسپارلاپ وتىرعانىن ايتسا، ترامپ سولتۇستىك كورەيانى تولىعىمەن جويىپ جىبەرەتىنىن مالىمدەگەن. بۇل تۋرالى قامشى ءتىلشىسى بريتانيالىق The Express باسىلىمىنا سىلتەمە جاساپ حابارلايدى. 

جاقىندا كيم چەن ىننىڭ قارىنداسى سولتۇستىك كورەيا سەۋلگە قارسى ارەكەت جاسايتىنىن جانە اسكەري كۇشتەرىنە ونى جۇزەگە اسىرۋىن تاپسىرعان. 

– مەن جوعارعى باسشىنىڭ، ءبىزدىڭ پارتيانىڭ جانە مەملەكەتىمىزدىڭ وكىلەتتىگىن قولدانا وتىرىپ، قارسىلاستارعا كەلەسى ارەكەتتى باتىل جۇرگىزۋدى تاپسىردىم: جاۋعا قارسى كەلەسى ءىس-قيمىل جاساۋ قۇقىعى ءبىزدىڭ ارميانىڭ باس شتابىنا جۇكتەلەدى، – دەدى كيم چەن ىننىڭ قارىنداسى.

ونىڭ بۇرىن-سوڭدى بولماعان اگرەسسياسى اقش-تىڭ باستى وداقتاسى سەۋلدىڭ الاڭداۋشىلىعىن تۋدىردى.

باسىلىمنىڭ جازۋىنشا، سولتۇستىك جانە وڭتۇستىك كورەيا اراسىنداعى كەز كەلگەن جانجال 3ء-شى دۇنيەجۇزىلىك سوعىسقا ۇلاسادى دەپ بولجانۋدا، ويتكەنى جۇڭگو كيم چەن ىننىڭ كوممۋنيستىك مەملەكەتىنە جاناشىرلىق تانىتادى، ال اقش كاپيتاليستىك وڭتۇستىكپەن وداق.

ۆاشينگتون مەن پحەنيان بايلانىسى ءبىراز ۋاقىت بويى شيەلەنىسىپ كەلگەن. 

اقش پرەزيدەنتى دونالد ترامپ بۇۇ-نىڭ باس اسسامبلەياسىنا جولداعان العاشقى ۇندەۋىندە سولتۇستىك كورەيانى تولىعىمەن جويىپ جىبەرەتىنىن ايتقان.

– ءبىزدىڭ عالامشارىمىزدىڭ قاسىرەتى – جالعان رەجيمدەردىڭ شاعىن توبى. ەگەر ءادىل ادامدار زۇلىم ادامدارعا قارسى شىقپاسا، وندا زۇلىمدىق جەڭىسكە جەتەدى، – دەدى ترامپ.

ارتىنشا ول سولتۇستىك كورەياداعى ۇرلاۋ، قىسىم كورسەتۋ جانە يادرولىق سىناقتار تۋرالى ايتقان.

– اقش ۇلكەن كۇش پەن شىدامدىلىققا يە. ەگەر ءوزىمىزدى نەمەسە وداقتاستارىمىزدى قورعاۋعا ءماجبۇر بولساق، بىزدە سولتۇستىك كورەيانى تولىعىمەن جويۋدان باسقا امال قالمايدى، – دەدى اقش پرەزيدەنتى.