جامبىل وبلىسىندا مەكتەپ وقۋشىلارىنىڭ جاپپاي توبەلەسى كەزىندە قايتىس بولعان ءبىر جاسوسپىرىمگە قاتىستى سوتقا دەيىنگى تەرگەۋ جۇمىستارى باستالدى.

– كامەلەتكە تولماعان ءجاسوسپىرىمنىڭ ءولىمى بويىنشا تەرگەۋ جۇمىستارى باستالدى. قازىرگى ۋاقىتتا توبەلەسكە قاتىسۋشىلاردىڭ بارلىعى انىقتالىپ، جاۋاپ الىندى. قوعامدىق ءتارتىپتى بۇزعاندارى ءۇشىن بالالارعا ق ر قىلمىستىق كودەكسىنىڭ 293-بابى 2-بولىگى (بۇزاقىلىق) بويىنشا ءىس قوزعالدى. سونداي-اق اتالعان دەرەك بويىنشا ءبىرقاتار سوت مەديسينالىق ساراپتامالار تاعايىندادى، – دەدى جامبىل وبلىسى پوليسيا دەپارتامەنتىنىڭ باسشىسى جانات سۇلەيمەنوۆ.

ونىڭ ايتۋىنشا، تەرگەۋ بارىسىندا بالالاردىڭ نەلىكتەن مۇنداي ارەكەتكە بارعانى انىقتالدى. 

ەسكە سالا كەتەيىك، جامبىل وبلىسىندا مەكتەپ وقۋشىلارىنىڭ جاپپاي توبەلەسى كەزىندە ءبىر ءجاسوسپىرىم كوز جۇمعان بولاتىن. قايعىلى وقيعا ماۋسىمنىڭ 12-نەن 13-نە قاراعان ءتۇنى ساعات 23:40 شاماسىندا بولعان. 5 بالاعا 16 جەتكىنشەكتىڭ جابىلۋى سالدارىنان، 15 جاستاعى ورالبەك كەتەبايەۆ 8 جەردەن پىشاقتالىپ، اۋرۋحانادا جان تاپسىرعان بولاتىن.