ۇلتتىق قاۋىپسىزدىك كوميتەتىنىڭ بۇرىنعى باسشىسى نارتاي دۇتبايەۆ 2017 جىلى مەملەكەتتىك قۇپيانى جاريالاعانى جانە قىزمەت بابىن اسىرا پايدالانعانى ءۇشىن 7،5 جىلعا سوتتالدى. كەيىن ونىڭ جازاسىن 12 جىلعا دەيىن ۇزارتتى، ودان سوڭ قايتا قىسقارتتى، اقىرى ول مەرزىمىنەن بۇرىن بوستاندىققا شىقتى دەپ جازادى sputniknews.kz سايتى.
بۇل اقپاراتتى شىعىس قازاقستان وبلىستىق سوتىنىڭ سۋدياسى ەلدوس جۇماقسانوۆ راستادى.
"كەشە، 18 ماۋسىمدا بوساتىلدى. سوتتىڭ ۇكىمى – مەرزىمىنەن بۇرىن شارتتى تۇردە بوساتۋ. سوت اكتىسىنە شاعىم تۇسكەن جوق، ەشكىم قارسىلىق بىلدىرمەدى. ۇكىم زاڭدى كۇشىنە ەندى" دەدى جۇماقسانوۆ.
ونىڭ ايتۋىنشا، دۇتبايەۆقا بەرىلگەن جازانىڭ مەرزىمى قايتا ەسەپتەلدى. 2020 جىلى 11 قاڭتاردا قىلمىستىق كودەكسكە ەنگىزىلگەن وزگەرىستەر مەن تۇزەتۋلەر كۇشىنە ەنگەن بولاتىن. وعان سايكەس، ورتا دەڭگەيدەگى قاۋىپسىزدىگى بار كولونيادا جازاسىن وتەپ جۇرگەندەر جازانىڭ مەرزىمىن قايتا ەسەپتەۋگە ءوتىنىش بەرە الادى. سوتتالعانداردىڭ تەرگەۋ يزولياتورىندا وتكىزگەن ءبىر كۇنى تۇرمەدەگى ءبىر جارىم كۇنگە تەڭەستىرىلگەن بولاتىن.
"سوت جازانىڭ مەرزىمىن قايتا ەسەپتەپ شىعۋعا مىندەتتى. وسى جۇمىس اتقارىلىپ، 30 ساۋىردە ءتيىستى قاۋلى شىعارىلدى. وسىدان كەيىن سوت جازانىڭ مەرزىمى جارتىسىنان اسقانىن، سونداي-اق، ونىڭ جاسىن ەسكەرىپ، مەرزىمىنەن بۇرىن شارتتى تۇردە بوساتۋ تۋرالى ءوتىنىشتى قاراپ، وڭ شەشىم شىعاردى"، - دەپ اتاپ كورسەتتى جۇماقسانوۆ.
نارتاي دۇتبايەۆ 2001-2006 جىلدار ارالىعىندا قازاقستاننىڭ ۇلتتىق قاۋىپسىزدىك كوميتەتىن باسقاردى.
2017 جىلى 24 تامىزدا ونى مەملەكەتتىك قۇپيانى جاريالاعانى جانە قىزمەت بابىن اسىرا پايدالانعانى ءۇشىن ايىپتاپ، جەتى جارىم جىلعا باس بوستاندىعىنان ايىرعان بولاتىن. وعان مەملەكەتتىك قىزمەتتە جۇمىس ىستەۋگە تىيىم سالىندى.
ال 2018 جىلى نارتاي دۇتبايەۆتىڭ جازاسىن 12 جىلعا دەيىن ۇزارتتى. ۇلتتىق قاۋىپسىزدىك كوميتەتىنىڭ ەكس-باسشىسىنا قوسىمشا ايىپتار تاعىلدى. اتاپ ايتقاندا، بيلىكتى تەرىس پيعىلدا پايدالانۋ، سەنىپ تاپسىرىلعان مۇلىكتى يەمدەنۋ جانە اقشا جىلىستاتۋ سياقتى قىلمىستار بار.
2019 جىلى قاڭتار ايىندا دۇتبايەۆتىڭ جازاسىن 10 جىلعا قىسقارتتى.
پىكىر قالدىرۋ