الماتى قالاسى مەدەۋ اۋدانى اكىمىنىڭ ورىنباسارى بەرىك سولتانبايەۆ الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين باسپا ءسوز كونفەرەنسياسىنىڭ بارىسىندا 20-21 ماۋسىم جاپپاي دەزينفەكسيالاۋ كەزىندە قانداي نىسانداردىڭ قىزمەتى توقتاتىلاتىنىن حابارلادى.

ەسكە سالا كەتەيىك، قالالىق كوميسسيانىڭ كوروناۆيرۋس ينفەكسياسىنىڭ تارالۋىن بولدىرماۋ بويىنشا شەشىمىنە بايلانىستى الماتىدا 20-21 ماۋسىم كۇندەرى قالاداعى ەپيدەميولوگيالىق جاعدايدى تۇراقتاندىرۋ ءۇشىن جاپپاي دەزينفەكسيالاۋ شارالارى جۇرگىزىلەدى.

– مەدەۋ اۋدانىندا بۇگىن جانە ەرتەڭ بارلىق ويىن-ساۋىق ورتالىقتارىنىڭ، ساۋدا ورتالىقتارىنىڭ، ساۋدا ۇيلەرىنىڭ، بازارلاردىڭ، سۋپەرماركەتتەردىڭ، فيتنەس-ورتالىقتار مەن ستاديونداردىڭ قىزمەتى توقتاتىلادى. سونداي-اق، ساياباقتار، سكۆەرلەر،بۋلۆارلار، جاعالاۋلار مەن باسقا دا قوعامدىق ورىندارعا دا بارۋعا بولمايدى، – دەپ حابارلاعان بەرىك سولتانبايەۆ شىمبۇلاق تاۋلى كۋرورتى، مەدەۋ بيىك تاۋلى مۇز ايدىنى، كوكتوبە، بۋتاكوۆكا وسى كەزەڭدە كەلۋشىلەر ءۇشىن جابىق بولاتىنىن اتاپ ءوتتى.

مەدەۋ اۋدانىنىڭ اۋماعىندا 19 سوو، سو، ءسۇ، 2 بازار، 17 سۋپەرماركەت، 31 فيتنەس ورتالىق، 2 ءىرى ساياباق جانە 20 سكۆەر بار. بارلىق كورسەتىلگەن نىسانداردا دەزينفەكسيا جۇرگىزۋ جوسپارلانعان. وڭدەۋ جۇرگىزۋ ءۇشىن ادامدار مەن جانۋارلار ءۇشىن قاۋىپتىلىگى تومەن زاتتاردىڭ 4 كلاسىنا جاتاتىن پرەپاراتتار قولدانىلادى. ساۋدا نىساندارىنىڭ دەزينفەكسياسى ولاردىڭ جەكەمەنشىك يەلەرىمەن جۇزەگە اسىرىلادى.

سونداي-اق، قوعامدىق تاماقتانۋدىڭ 380 نىسانى. ولاردىڭ ىشىندە 118 جازعى الاڭدار بار. قوعامدىق تاماقتانۋ نىساندارىنا تەك تاپسىرىسپەن الدىرۋ ارقىلى جانە سانيتارلىق-ەپيدەميولوگيالىق نورمالار مەن الەۋمەتتىك قاشىقتىقتى ساقتاۋ ارقىلى جازعى الاڭداردىڭ جۇمىس ىستەۋىنە رۇقسات ەتىلگەن.

سوو ورنالاسقان جەكە ەسىگى بار ءدامحانالار مەن مەيرامحانالار شتاتتىق رەجيمدە جۇمىس ىستەي الادى.

كوروناۆيرۋستىق ينفەكسيانىڭ تارالۋىنا جول بەرمەۋ ماقساتىندا بۇرىندا الماتى قالاسىنىڭ اكىمى باقىتجان ساعىنتايەۆتىڭ تاپسىرماسى بويىنشا قالانىڭ بارلىق اۋداندارىندا سانيتارلىق-ەپيدەميولوگيالىق قاۋىپسىزدىك شارالارىن ساقتاۋدى باقىلاۋ بويىنشا مونيتورينگتىك توپتار قۇرىلدى.

– الماتى قالاسى اكىمىنىڭ تاپسىرماسىنا سايكەس، ءار اۋداندا مونيتورينگتىك توپتار قۇرىلدى. بۇگىنگى تاڭدا مەدەۋ اۋدانىنىڭ اۋماعىندا 300-دەن استام نىسان تەكسەرىلدى. ونىڭ ىشىندە 114 نىسان ءتارتىپ بۇزۋشىلىقتى قالپىنا كەلتىرگەنگە دەيىن جابىلدى، – دەپ تولىقتىردى بەرىك سولتانبايەۆ.

مەدەۋ اۋدانى اكىمىنىڭ ورىنباسارى دەزينفەكسيا كەزىندە، اۋدان بويىنشا پوليسيا قىزمەتكەرلەرىمەن پاترۋلدەۋ كۇشەيتىلەتىنىن ايتىپ، سونداي-اق تۇرعىنداردى كوزدەلگەن شارالاردى ساقتاۋعا جانە كارانتين رەجيمىن ۇستانۋعا شاقىردى.