21 ماۋسىم كۇنى قازاقستاننىڭ بارلىق وڭىرىندە ۇلتتىق ءبىرىڭعاي تەستىلەۋ باستالادى. الماتى قالاسىندا ءبىرىنشى لەگكە ەنگەن 235 ادام ەمتيحاندى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە تاپسىراتىن بولادى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.
وڭىرلىك كوممۋنيكاسيالار قىزمەتىنەن ءمالىم ەتكەندەي، ۇبت وتكىزۋ كەزىندە بارلىق سانيتارلىق-ەپيدەميولوگيالىق تالاپتار ساقتالادى.
قالالىق ءبىلىم باسقارماسى مەن الماتى قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ COVID-19 ينفەكسياسىنىڭ تارالۋ ءقاۋپىن ازايتۋعا بايلانىستى بىرلەسىپ بەكىتكەن جوسپارىنا سايكەس، اباي اتىنداعى قازۇپۋ-دە تەست تاپسىرۋشىلارعا دەزينفەكسيادان ءوتۋ ءۇشىن 5 كەزەڭنەن تۇراتىن بارلىق جاعدايلار جاسالعان: - بارريكادالىق شەكتەۋ لەنتالارى ورناتىلدى جانە تەست تاپسىرۋشىلار اراسىندا كەم دەگەندە 2 مەتر قاشىقتىقتى ساقتاۋ ءۇشىن سىناققا قاتىسۋشىلار سانى ەكى ەسەگە ازايتىلدى (50 پايىزعا).
ول ءۇشىن 15 اۋديتوريا ازىرلەندى؛
- تەپلوۆيزورلار؛
- باكتەريسيدتى لامپالار جانە ءاربىر اۋديتورياعا اۋا رەسيركۋلياتورى؛
- تەست تاپسىرۋشىلار ءۇشىن قاراپايىم ماسكالار؛
- دەزينفەكسيالاۋ تۇنەلى؛
- جەدەل جاردەم كولىگى؛
- دەنزينفەكسيالىق توسەنىشتەر؛
- قولدانىلعان ماسكالاردى جويۋ ءۇشىن جاشىكتەر؛
- سانيتايزەرلەر؛
- مەدپۋنكتتە ماسكالار مەن سالفەتكالار قورى؛
- مەملەكەتتىك كوميسسيا مۇشەلەرى ءۇشىن ماسكالار؛
- بارلىق اۋديتوريادا بەينەباقىلاۋ كامەرالارى ورناتىلعان.
تەست وتكىزىلەتىن كۇندەرى تقسقبد قىزمەتكەرلەرى ۇبت وتكىزۋ پۋنكتتەرىنىڭ سانيتارلىق- پيدەميولوگيالىق جاعدايىن باقىلايتىن بولادى.
ەسكە سالا كەتەيىك، الماتىدا بارلىعى 14 972 ادام تەست تاپسىرادى دەپ جوسپارلانۋدا. سونىڭ ىشىندە 9 047ء-سى (97%) بيىلعى جىلدىڭ تۇلەكتەرى بولسا، 5 925ء-ى وتكەن جىلداردىڭ جانە كوللەدجدەردىڭ تۇلەكتەرى.
ەسكە سالايىق، بۇعان دەيىن ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ۇلتتىق ءبىرىڭعاي تەست وتكىزۋگە دايىندىق بارىسىنداعى كەمشىلىكتەر تۋرالى ايتقان بولاتىن.
بيىلعى ۇبت-عا 4-توقسانداعى وقۋ باعدارلاماسى ەنگىزىلمەيدى. كوروناۆيرۋسكە شالدىققان سىناق تاپسىرۋشىلار ءۇشىن قوسىمشا اۋديتوريالار دايىندالدى. سونداي-اق تۇلەكتەر ۇبت-نى قاي كۇنى جانە قايدا تاپسىراتىنىن ۇلتتىق تەستىلەۋ ورتالىعىنىڭ سايتىنان جانە ارنايى مەسسەندجەردەن بىلە الاتىنى حابارلاندى.
پىكىر قالدىرۋ