مەگاپوليس اكىمى باقىتجان ساعىنتايەۆ ءوزىنىڭ Twitter-دەگى پاراقشاسىندا ەپيدەميولوگيالىق جاعداي تۇراقتانعان سوڭ ۋاقىتشا جاياۋ جۇرگىنشى ايماقتارىن قۇرۋ جونىندەگى پيلوتتى جوبانىڭ قولعا الىناتىنىن حابارلادى.

ءبىرىنشى كەزەڭدە المالى اۋدانىنىڭ بەس كوشەسى ءار جەكسەنبى سايىن ءبىر كۇنگە جابىلادى. جوبا ەپيدەميولوگيالىق جاعداي تۇراقتانعان سوڭ عانا باستالادى.

– ۋاقىتشا جاياۋ جۇرگىنشىلەر ايماعىن قۇرۋ ءۇشىن دەمالىس كۇندەرى ءبىرقاتار كوشەنى جابۋدى ساراپشىلارمەن تالقىلادىق. ءبىرىنشى كەزەڭدە قابانباي باتىر — گوگول — نازاربايەۆ — ابىلاي حان داڭعىلىنداعى شارشى ايماق ۇسىنىلدى. جۇمىستى قالاداعى ەپيدەميولوگيالىق جاعداي تۇراقتانعاننان سوڭ باستايمىز، – دەپ جازدى ب. ساعىنتايەۆ.

ياعني، قابانباي باتىر جانە گوگول كوشەلەرىنىڭ اراسىنداعى پانفيلوۆ كوشەسى، سونىمەن قاتار نازاربايەۆ جانە ابىلاي حان داڭعىلدارى اراسىنداعى بوگەنباي باتىر، تولە بي، قازىبەك بي، ايتەكە بي كوشەلەرى ۋاقىتشا جاياۋ جۇرگىنشىلەر ايماقتارىنا اينالاتىن بولادى. قوعامدىق كولىكتەر مەن ارنايى ماشينالاردىڭ جۇرۋىنە رۇقسات بەرىلەدى.

باستى ماقسات – كولىك جۇكتەمەسىن ازايتۋ ال قالانىڭ باسقا اۋداندارىندا ءبىر جەكسەنبى كۇنى ءبىر عانا كوشە جابىلادى.

ساراپشىلار قوعامداستىعى مەگاپوليستىڭ ەكولوگيالىق احۋالىن جاقسارتۋدىڭ ءبىرقاتار شارالارىن قاراستىرۋدا. اتاپ ايتساق، جۇك كولىگى مەن موتوسيكلدەردىڭ قوزعالىسىنا زەرتتەۋ جۇرگىزىلەدى.

بۇل ماڭىزدى ىسكە كولىك، ەكولوگيا، ۋربانيستيكا، قالا قۇرىلىسى سالالارىنىڭ ماماندارى تارتىلادى. ولار ەكولوگيالىق احۋالدى جاقسارتۋ بويىنشا كەشەندى شارالاردى ۇسىنۋ ءۇشىن قالانىڭ كولىك جۇكتەمەسىن، زالالدى جانە دىبىستىق زاتتاردىڭ تارالۋ دەڭگەيىن جان-جاقتى زەرتتەپ، وزدەرىنىڭ باعالارىن بەرەتىن بولادى.