بۇگىن، 22 ماۋسىم كۇنى قىتايدا تۋعان ەتنيكالىق قازاقتار قاستەر مۇساحان ۇلى مەن مۇراگەر ءالىم ۇلى سەگىز اي قاماۋدا بولعان سەمەيدەگى كولونيادان بوساپ شىقتى. بۇل تۋرالى ولاردىڭ ادۆوكاتى ءلاززات احاتوۆا حابارلادى، دەپ جازادى ازاتتىق. 

قاستەر مۇساحان ۇلى مەن مۇراگەر ءالىم ۇلى "مەملەكەتتىك شەكارانى قاساقانا زاڭسىز كەسىپ ءوتتى" دەگەن ايىپپەن قاماۋعا الىنعان بولاتىن. قاڭتار ايىندا شىعىس قازاقستان وبلىسى زايسان اۋداندىق سوتى شىڭجاڭنان قازاقستانعا قاشقان ەكى قازاقتى ءبىر جىلعا باس بوستاندىعىنان ايىرۋ تۋرالى شەشىم شىعارعان. سوت ۇكىمىنە دەيىنگى قاماۋدا بولعان كۇندەرى ەكى كۇنگە سانالاتىن بولدى.

ءقازىر قاستەر مۇساحان ۇلى مەن مۇراگەر ءالىم ۇلى ادۆوكاتى ءلاززات احاتوۆامەن بىرگە اقمولا وبلىسى قوياندى اۋىلىنا بارا جاتىر. ول جەردە مۇراگەردىڭ اپكەسى نۇرگۇل تۇرادى.

– ءقازىر قۋانىشتان وزدەرىنە كەلە الماي وتىر. “تۇنىمەن ۇيىقتامادىق، 5 ساعات قالدى، ەكى جارىم ساعات قالدى دەپ، مينۋت ساناپ كەتتىك” دەيدى. باسىندا جىگىتتەردى سەمەيدە قالدىرعىسى كەلدى. ءبىراق ءبىزدىڭ وتىنىشىمىزگە تۇسىنىستىكپەن قاراپ، رايىنان قايتتى، –  دەدى ءلاززات احاتوۆا.

ادۆوكاتتىڭ سوزىنشە، مۇساحان ۇلى مەن ءالىم ۇلىنىڭ بوسقىن مارتەبەسىن سۇراۋشى كۋالىگى تامىزعا دەيىن جارامدى.

بوسقىن مارتەبەسىن بەرۋدى اقمولى وبلىسىنىڭ ميگراسيا قىزمەتى قاراستىرادى. ءقازىر ولاردىڭ قولىنا شىلدەنىڭ سوڭىنا دەيىن جارامدى ۋاقىتشا كۋالىك بار. ول ۋاقىتقا دەيىن ماسەلە شەشىلۋگە ءتيىس.

سەمەي قالاسىنىڭ بەلسەندىلەرى مۇساحان ۇلى مەن ءالىمۇلىن كولونيادان شىققان كەزدە كۇتىپ العىسى كەلگەن. ءبىراق بۇل مۇمكىن بولمادى – ەكى جىگىتتى جوسپارلانعان ۋاقىتتان بىرنەشە ساعات بۇرىن شىعارعان. ادۆوكاتتىڭ ايتۋىنشا، كولونيا اكىمشىلىگى مۇنداي قادامعا كولونيا الدىندا كوپ ادام جينالماس ءۇشىن بارعان.

– تەلەفوندارىمىزدى تاپسىرىپ، ىشكە كىرگەندە، مەكەمە باسشىسى الدىمىزدان شىعىپ، ەكى جىگىتتى ەشكىممەن بايلانىستىرماي، الىپ شىعۋىمىزدى ءوتىندى. ويتكەنى، مەكەمەدەن كورونوۆيرۋسپەن اۋىرعاندار شىعىپ جاتىر ەكەن. “ەكەۋىنىڭ دە، باسقا ادامداردىڭ دا دەنساۋلىعى مەن ءومىرىن ويلاڭىزدار. ءقازىر وسىنداي كەزەڭ، ۆيرۋس وشاعى سەمەيدەن شىعىپ جاتىر. قاستەردىڭ دە ىستىعى كوتەرىلىپ، ءبىراز ەم قابىلدادى” –  دەگەن سوڭ، تاڭعى 7:00-دە قالادان شىعىپ كەتتىك، –  دەدى احاتوۆا.

مۇساحان ۇلى مەن ءالىم ۇلى 2019 جىلدىڭ قازان ايىندا قازاقستان مەن قىتايدىڭ شەكاراسىن كەسىپ ءوتىپ، شىعىس قازاقستان وبلىسىنىڭ زايسان اۋدانىنان ءبىر-اق شىقتى. سول جەردەن الماتى قالاسىنا اتتانىپ، قازاقستان ادام قۇقىعى جونىندەگى بيۋروسىندا باسپا ءسوز ءماسليحاتىن وتكىزدى. ءماسليحات كەزىندە ولار شىڭجاڭدا ءدىنى يسلام حالىقتارعا قىسىم كورسەتىلىپ جاتقانىن، سول سەبەپتى قىتايدا قاشۋعا ءماجبۇر بولعانىن ايتتى. قازاقستان بيلىگى كوپ ۇزاماي ەكەۋىن قاماۋعا الدى. 2020 جىلدىڭ 21 قاڭتارىندا “مەملەكەتتىك شەكارانى قاساقانا زاڭسىز كەسىپ ءوتتى” دەپ ايىپتالعان مۇساحان ۇلى مەن ءالىم ۇلى كىنالى دەپ تابىلىپ، باس بوستاندىعىنان ايرىلدى، ءبىراق قىتايعا جىبەرىلمەيتىن بولدى.

شىڭجاڭداعى مۇسىلمان حالىقتارعا قىسىم كورسەتىلۋى تۋرالى حابارلار 2017 جىلدان باستاپ تاراي باستادى. 2018 جىلى بۇۇ شىڭجاڭ "لاگەرلەرىندە" ءبىر ميلليونعا جۋىق ۇيعىرلار مەن ءدىنى يسلام وزگە حالىقتاردىڭ بارىن مالىمدەگەن بولاتىن. باستاپقىدا مۇنى جوققا شىعارعان جۇڭگو "لاگەرلەردىڭ" بارىن مويىندادى، ءبىراق ولاردى ەكسترەميزم مەن تەرروريزمگە قارسى كۇرەس ءۇشىن قۇرىلعان "ءبىلىم بەرۋ جانە كاسىپكە باۋلۋ ورتالىقتارى" دەپ سيپاتتادى.