اقتوبە وبلىسىنىڭ اكىمى وڭداسىن ءورازاليننىڭ توراعالىعىمەن اپپارات وتىرىسى ءوتتى. وبلىس اكىمىنىڭ ورىنباسارلارى، دەپارتامەنت، باسقارما باسشىلارى مەن ۆيدەوكونفەرەنسيا بايلانىسى ارقىلى قالا، اۋدان اكىمدەرى قاتىستى. ايماق باسشىسى الدىمەن اۋداندارداعى كاسىپكەرلىك سالاسىنىڭ تومەندىگىن سىنعا الدى. كەيبىر اۋدانداردا بىردە-بىر جاڭا جوبا جۇزەگە اسپاعان. كاسىپكەرلىكپەن اينالىسۋدىڭ جولدارىن حالىققا ءتۇسىندىرۋ جۇمىستارى ماردىمسىز. وبلىس اكىمى اۋدان باسشىلارى مەن «اتامەكەن» وڭىرلىك كاسىپكەرلەر پالاتاسىنىڭ ديرەكتورى

انار دارجانوۆاعا وسى باعىتتاعى جۇمىستى جانداندىرۋدى تاپسىردى.

وبلىس اكىمىنىڭ ءبىرىنشى ورىنباسارى نۇرجاۋعان قالاۋوۆ سانيتارلىق-ەپيدەميولوگيالىق احۋالعا شولۋ جاسادى.
وڭىردە پنيەۆمونيامەن اۋىراتىندار سانى ارتقانمەن بارلىعىنا ەم دوم جۇيەلى تۇردە كورسەتىلۋدە. تۇرعىنداردى ساقتىققا شاقىرۋ ماقساتىندا تەلەارنالار مەن الەۋمەتتىك جەلىلەردە ۇزدىكسىز تىكەلەي ەفيرلەر ۇيىمداستىرىلۋدا. بەتپەردەلەر مەن قولعاپ سانى جەتكىلىكتى. ءدارىحانالار مەن ساۋدا ورىندارىندا ولاردىڭ سانى ءۇش ملن. 60 مىڭ ەكسپرەسس تەست بار. وسى ورايدا،وبلىس اكىمى وڭداسىن ورازالين ناۋقاستارعا دەمالىسسىز قىزمەت كورسەتىپ جۇرگەن دارىگەرلەردىڭ ەڭبەگىن ەرەكشە اتاپ ءوتىپ، تۇرعىنداردى سالعىرتتىق تانىتپاۋعا شاقىردى.

«مەن اقتوبەلىك دارىگەرلەردىڭ ءبىلىمى مەن بىلىكتىلىگىنە سەنەمىن. اق حالاتتىلاردىڭ جۇمىسىنان كەمشىلىك ىزدەپ، ايىپتاۋدىڭ قاجەتى جوق. تۇرعىندار ەڭ الدىمەن ءوز دەنساۋلىقتارىنا وزدەرى جاۋاپتى. تالاپتاردى ورىنداماي، تىعىلىپ توي تومالاقتا جۇرگەندەر اۋىرادى، سوسىن اكىمدىك پەن دارىگەرلەردى كىنالاۋعا كوشەدى. ءاربىر ادام ءوزى ساقتانۋى ءتيىس»،-دەدى وبلىس اكىمى. سونداي-اق، قوعامدىق ورىنداردا دەزينفەكسيالىق شارالاردى كۇشەيتۋدى تاپسىردى.