رەسپۋبليكالىق Biz Birgemiz ونلاين-فورۋمىنىڭ بارىسىندا COVID-19-بەن كۇرەستە ەرەكشە بەلسەندىلىك تانىتقانداردىڭ ەڭبەكتەرى اتالىپ ءوتىلدى، ولاردىڭ اراسىندا دارىگەرلەر، پوليسيا قىزمەتكەرلەرى، ۆولونتەرلەر مەن جۋرناليستەر بار.

مەملەكەت باسشىسى ق.توقايەۆ رەسپۋبليكالىق Biz Birgemiz اكسياسىنا قاتىسقان ۆولونتەرلاردىڭ COVID-19 تارالۋىنا قارسى كۇرەسكە قوسقان زور ۇلەستەرىن اتاپ ءوتتى. ەلباسىنىڭ جانە جەكە ءوزىنىڭ اتىنان العىسىن ءبىلدىردى.

الماتى اكىمى باقىتجان ساعىنتايەۆ اتاپ وتكەندەي، توتەنشە جاعداي رەجيمى كەزىندە بارشا قازاقستاندىقتاردىڭ كومەگى ايتارلىقتاي ماڭىزدى بولدى.

– ۇنەمى قولداۋ مەن كومەك بەرۋگە دايىن تۇراتىن الماتىلىقتار العاشقى كۇننەن-اق قوعامدىق جۇمىستارعا بەلسەنە كىرىسىپ كەتتى. ولاردىڭ ءارقايسىسىنىڭ جانە مىڭداعان قالا تۇرعىندارىنىڭ ورتاق ىسكە قوسقان ۇلەستەرىنە باعا جەتپەيدى، – دەپ جازدى قالا اكىمى.

ب. ساعىنتايەۆ ءوزىنىڭ سوزىندە تج رەجيمى كەزىندە جۇگىزىلگەن پارمەندى شارالاردىڭ كوروناۆيرۋستىڭ جاپپاي تارالۋىنا توسقاۋىل بولعانىن قاداپ ايتتى. قالا تۇرعىندارىنىڭ بەرىلگەن ۇسىنىستاردى دەر كەزىندە قابىلداپ، وزدەرىن وقشاۋلاعاندارى ارقاسىندا جاعداي تۇزەلدى.

– ارينە، قالا تۇرعىندارىنىڭ تابيعات اياسىندا كەزدەسىپ، ءوزارا سىرلاسۋدى، كوشەلەر مەن سكۆەرلەردە سەرۋەندەۋدى ساعىنىپ قالعاندارىن جاقسى تۇسىنەمىن. ويتكەنى، بۇل – ءومىر. ءبىراق كوزگە كورىنبەيتىن جاۋ – پاندەميا ءبىزدىڭ ومىرىمىزگە تۇزەتۋلەر مەن وزگەرىستەر ەنگىزۋدە. سوندىقتان مەن الماتىلىقتاردى سانيتارلىق-ەپيدەميولوگيالىق قىزمەتتىڭ بارلىق تالاپتارىن مۇلتىكسىز ورىندۋعا شاقىرامىن. ول بارىنشا قاراپايىم، ياعني ءوزىمىزدى، جاقىندارىمىزدى، دوستارىمىزدى، ارىپتەستەرىمىزدى، ءتىپتى اينالامىزداعىلاردى ىندەتتى جۇقتىرۋ قاۋپىنەن ساقتايىق جانە بارىنشا اباي بولايىق، – دەپ جازعانب. ساعىنتايەۆ قالا تۇرعىندارىن بارىنشا ساق بولۋعا شاقىردى.

ىندەتكە قارسى كۇرەستە ەرەكشە كوزشە تۇسكەندەر «حالىق العىسى» مەدالىمەن جانە ەلباسىنىڭ العىس حاتتارىمەن ماراپاتتالدى. ولاردىڭ اراسىندا وليمپيادا چەمپيونى، قازاقستاننىڭ ەڭبەك ەرى، كسرو-نىڭ ەڭبەك سىڭىرگەن سپورت شەبەرى جاقسىلىق ۇشكەمپىروۆ، بوستاندىق اۋدانىنىڭ ءوق مپس ءبولىمىنىڭ باستىعى جاندوس تاسمانوۆ، دارىگەر-ينفەكسيونيست تامارا ۋتاگانوۆا، مەسەنات ميحايل لومتادزە، ءوز بەتىمەن ءومىر ءسۇرۋ ءۇيىنىڭ مەڭگەرۋشىسى ءومىرجان ءابىلقاسىموۆ، «قازاقستاننىڭ مەديسينالىق جاستارى» رقب جەتەكشىسى جانىبەك سولتاناي، قبتۋ جانىنداعى قازاقستان تەڭىز اكادەمياسىنىڭ ستۋدەنتى ديانا توقتار قىزى، «الماتى اقشامى» گازەتىنىڭ ءتىلشىسى اسەل داعجان بار.