2020 جىلعى 24 ماۋسىمدا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسى ءوتتى.

وتىرىستى ونلاين-رەجيمدە اشقان ۇلتتىق كوميسسيانىڭ ءتورايىمى ل.رامازانوۆا مەملەكەت باسشىسى قاسىم-جومارت توقايەۆتىڭ قويعان ماڭىزدى مىندەتتەردى ورىنداۋ ءۇشىن مەملەكەتتىك ورگانداردىڭ جاۋاپكەرشىلىگىن ارتتىرۋ قاجەتتىگىن اتاپ ءوتتى.

«ۇلتتىق كوميسسيا وتباسى مەن بالالاردىڭ مۇددەلەرىن قورعاۋعا قاتىستى وزەكتى ماسەلەلەردى تالقىلاۋ بويىنشا قوعامدىق ديالوگتى دامىتۋدى جالعاستىرۋدا. «وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى» زاڭ جوباسى ازىرلەندى. بۇگىنگى تاڭدا قۇقىق قورعاۋشى ۇەۇ-نىڭ بەلسەندى قاتىسۋىمەن 13 ونلاين-تالقىلاۋ وتكىزىلدى»، - دەدى ل.رامازانوۆا.

وتىرىستا قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ جونىندەگى ءىس-شارالار جوسپارىنىڭ ءبىرىنشى كەزەڭىنىڭ ورىندالۋ قورىتىندىسى باياندالدى.

وتباسى ينستيتۋتىن نىعايتۋعا، وتباسىلىق قۇندىلىقتاردى ىلگەرىلەتۋگە باعىتتالعان ءبىرقاتار الەۋمەتتىك-ماڭىزدى جوبالار ىسكە اسىرىلدى. جوعارعى سوتتىڭ قولداۋىمەن «باقىتتى وتباسى» وتباسىلىق سوتتار جانىنداعى وتباسىن رەسۋرستىق قولداۋدىڭ 12 ورتالىعىنىڭ قىزمەتى قامتاماسىز ەتىلدى (نۇر-سۇلتان، الماتى قالالارىندا، قاراعاندى، اقمولا، اتىراۋ، جامبىل، قوستاناي جانە شىعىس قازاقستان وبلىستارىندا). ەسەپتى كەزەڭدە ورتالىقتارعا 2 750-دەن استام ادام ءوتىنىش جاسادى، ونىڭ ىشىندە اجىراسۋ ماسەلەلەرى بويىنشا – 2030 ادام. تاتۋلاسۋعا دايىن ادامدار سانى 38،1% (774 ادام) قۇرادى.

«ÓNEGE» جوباسى شەڭبەرىندە 9 وڭىردە الەۋمەتتىك قىزمەتتەر 1125 كونسۋلتاسيالىق قىزمەت كورسەتتى جانە وتباسىلارداعى ومىرلىك قيىن جاعدايدىڭ 225 وقيعاسى بويىنشا كومەك بەردى.

19 مىڭ ادام تەگىن كەڭەس الدى، ونىڭ ىشىندە 350ء-ى قيىن ومىرلىك جاعدايعا تاپ بولعان.

«رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ قۇرىلىمىندا وتباسى ينستيتۋتىن زەرتتەۋ ورتالىعى اشىلدى. اعىمداعى جىلى ورتالىق وتباسىنىڭ وزەكتى ماسەلەلەرى بويىنشا ءبىرقاتار زەرتتەۋلەر جۇرگىزىلەتىن بولادى.

2019 جىلى نۇر-سۇلتان قالاسىندا «جانۇيا» ورتالىعى اشىلدى، ول «ءبىر تەرەزە» قاعيداتى بويىنشا قالا تۇرعىندارىنا كورسەتىلەتىن مەملەكەتتىك قىزمەتتەردى بىرىكتىرەدى جانە وتباسىلارمەن جەكە جۇمىس جۇرگىزەدى. بۇگىنگى كۇنى ورتالىققا 14،8 مىڭ سۇراقپەن 7 مىڭعا جۋىق ادام جۇگىندى. 11،5 مىڭنان استام كەڭەس بەرىلىپ، ونىڭ بارىسىندا 3،5 مىڭنان استام ماسەلە شەشىلدى.

تالقىلاۋ بارىسىندا قازاقستانداعى وتباسىلىق جانە گەندەرلىك ساياسات سالاسىنداعى نىسانالى ينديكاتورلارعا قول جەتكىزۋگە بايلانىستى ءبىرقاتار ماسەلەلەر اتاپ ءوتىلدى.

وتىرىسقا قاتىسۋشىلارعا يۋنفپا-نىڭ قازاقستانداعى وكىلدىگى وتكىزگەن «ۇرپاق جانە گەندەر» زەرتتەۋ قورىتىندىلارى ۇسىنىلدى. دەموگرافيالىق دامۋدى انىقتايتىن حالىقتىڭ قونىستانۋى سالاسىنداعى فاكتورلاردىڭ ءبىرى ادامنىڭ رەپرودۋكتيۆتى دەنساۋلىعىن قورعاۋ بولىپ تابىلاتىنى، ال ونىڭ باستى ماقساتى – دەنى ساۋ بالالاردىڭ دۇنيەگە كەلۋى اتاپ ءوتىلدى.

سوڭىندا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ 20 جىلدىعىنا ارنالعان كىتاپ تانىستىرىلدى.

وتىرىس قورىتىندىسى بويىنشا ءتيىستى مينيسترلىكتەر مەن جەرگىلىكتى اتقارۋشى ورگاندارعا ناقتى تاپسىرمالار بەرىلدى.