الماتى قالاسى الەۋمەتتىك ءال-اۋقات باسقارماسى باسشىسىنىڭ ورىنباسارى دانيار الكەباي ۇلى الماتىدا جىل باسىنان بەرى 22 مىڭ ادام جۇمىسپەن قامتىلعانعانىن مالىمدەدى.

– جىل باسىنان بەرى الماتى قالاسى جۇمىسپەن قامتۋ ورتالىعىنا 36 مىڭنان استام ادام جۇگىنگەن. ونىڭ 22 مىڭى جۇمىسپەن قامتىلعان، ياعني 17 مىڭى تۇراقتى جۇمىس ورنى، 5 مىڭى ۋاقىتشا جۇمىس. قوعامدىق جۇمىسقا 4 039 ادام ورنالاستى، – دەدى ول. 

ودان بولەك "بيزنەس باستاۋ" كۋرسىنان وتكەن 706 ادام قارجىلاي گرانتقا يە بولعان، ول ادامدار ءقازىر ءوز كاسىپتەرىن اشىپ، جۇمىس ىستەۋدە. 

الماتى قالاسى حالىقتى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا ورتالىققا كۇنىنە 200-500 ارالىعىندا ادام جۇگىنەتىنىن ايتادى.

– كارانتين كەزىندە جۇمىسپەن قامتۋ ورتالىعىنا جۇگىنەتىندەر سانى ەكى ەسە ارتتى. 5 مىڭنان اسا ادام جۇگىندى. ودان بولەك تاعى 12 مىڭ ادام كەڭەس سۇراپ كەلگەن. قالاداعى جۇمىسسىزدىقتى بولدىرماس ءۇشىن ءقازىر "جۇمىسپەن قامتۋدى جول كارتاسى" ىسكە قوسىلعان. ول، اسىرەسە، قۇرىلىس سالاسىنا باعىتتالعان، سوندىقتان وسى سالادا كوپتەگەن ادام تۇراقتى جۇمىسپەن قامتىلدى، – دەيدى ول. 

جۇمىسپەن قامتۋ ورتالىعىنا الماتىدا تىركەۋدە تۇرعان نەمەسە ۋاقىتشا تىركەۋدە تۇرعان ادامدار جۇگىنە الادى. ورتالىقتا جۇمىس ىزدەۋشىلەردەن تالاپ ەتىلەتىن قۇجاتتار: جەكە كۋالىك، ديپلوم (ەگەر بولسا) جانە ەڭبەك كارتوچكاسى.