الەۋمەتتىك جەلىدە بىرنەشە ادام Work and travel باعدارلاماسىمەن "اقش-قا اپارامىز" دەپ سەندىرگەن نۇر-سۇلتان قالاسىنداعى Corvette Center جشس-دان اقشالارىن قايتارا الماي جۇرگەنىن جازۋدا. قامشى ءتىلشىسى "كومپانيا قارجىمىزدىڭ قوماقتى بولىگىن قايتارعىسى كەلمەي وتىر" دەگەن ەكى جابىرلەنۋشىمەن سويلەستى.
نۇر-سۇلتاندىق مايا قۋانىشوۆا مەن ايجان ءابجان قىزى كومپانيامەن كەلىسىم-شارتقا وتىرعان. ول بويىنشا كومپانيا قىزداردى اقش-قا اپارىپ، سول جاقتان 3 ايعا جۇمىس تاۋىپ بەرۋگە مىندەتتەلگەن. ورتالىق كورسەتىلەتىن قىزمەت ءۇشىن اقشانى الدىن الا العان. الايدا ءتۇرلى سىلتاۋ ايتىپ ۆيزا ۋاقىتىن كەشىكتىرگەن. ارتىنشا پاندەميانىڭ كەدەرگى بولىپ جاتقانىن حابارلاپ، 22 ماۋسىمدا باعدارلامانىڭ مۇلدە بولمايتىنىن، اقشالارىنىڭ باسىم بولىگىنىڭ قايتپايتىنىن مالىمدەگەن. سوڭعى بىرنەشە كۇننەن بەرى كومپانيا وكىلدەرىمەن بايلانىسۋ مۇمكىن بولماي تۇر.
مايا قۋانىشوۆا قاراجاتىن قايتارۋ ءۇشىن "اقىرىنا دەيىن بارام" دەپ وتىر.
– العاشقىدا ورتالىققا ۆيزاعا دەپ 150 مىڭ تەڭگە تولەدىم. كەيىننەن تاعى 1575 دوللار (632 378 تەڭگە) تولەۋىمدى سۇرادى. تولەدىم. جالپى اتالعان ورتالىققا 800 مىڭ تەڭگە كولەمىندە اقشا بەردىم. كومپانيامەن جاسالعان كەلىسىمشارت بويىنشا ءبىز اقش-تا 25 مامىردان قىركۇيەك ايى ارالىعىندا بولۋىمىز كەرەك ەدى. الايدا ورتالىق باسشىلارى ۆيزا دايىن بولماي جاتقانىن ايتىپ، كۇتۋىمدى سۇرادى. پاندەمياعا بايلانىستى امەريكاعا ساپارىمىز تاعى كەيىنگە قالدى. ەندى مىنە، 22 ماۋسىمدا باعدارلامانىڭ مۇلدە بولمايتىنىن، بەرگەن قاراجاتىمىزدىڭ 200 مىڭ تەڭگەسى عانا قايتاتىنىن ايتىپ وتىر. وسى باعدارلامانى جۇزەگە اسىرۋمەن اينالىساتىن باسقا اگەنتتىكتەر ستۋدەنتتەرگە اقشالارىن ادىلەتتى تۇردە قايتارىپ جاتىر. ال Corvette Center پاندەميانى ءبىزدىڭ ەسەبىمىزدەن ءوز پايداسىنا شەشكىسى كەلەدى. ستۋدەنتتەر "Work and travel" باعدارلاماسىن ساياحات قانا ەمەس، جاقسى تابىس كوزى دەپ بىلەدى. سوندىقتان امەريكاعا بارۋ ءۇشىن جۇمىس ىستەپ، نەسيە الىپ قاراجات جينايدى. شىققان شىعىندى سول جاقتا اقتاپ الامىز دەپ ۇمىتتەنەدى. ەندى ولارعا ارمانىنا جەتپەك تۇگىلى، بەرگەن قارجىسىن قايتارۋ مۇڭ بولىپ تۇر.
قولىمدا كومپانيامەن جاساسقان كەلىسىمشارت، قۇجاتتارىم تولىق بار. زاڭگەرلەر زاڭ ءبىزدىڭ جاقتا دەپ وتىر. مەن مۇنى وسىلاي قالدىرىپ قويمايمىن. سوتقا دەيىن بارساق تا ادىلدىككە جەتكىمىز كەلەدى، – دەدى مايا قۋانىشوۆا قامشى تىلشىسىنە.
اقشاسىن قايتارا الماي جۇرگەندەردىڭ ءبىرى ايجان ءابجان قىزى "مەكەمە 600 مىڭ تەڭگەگە جۋىق اقشانى ۇستاپ قالۋ ارقىلى، ءوز پايداسىن ويلاپ وتىر" دەيدى.
– مەن 2019 جىلدىڭ 26 تامىزىندا اگەنتتىكپەن كەلىسىمشارتقا قول قويدىم. اقش-تا جۇمىس جاساۋ ءۇشىن 5 ەتاپتى تولەم جاساۋ قاجەت. ءار ەتاپتا قاراجات سالىپ وتىردىق. پاندەميا بولماعاندا وسى ەتاپتاردان كەيىن امەريكاعا كەتۋىمىز قاجەت ەدى. الايدا ناۋرىزدا كارانتين ەنگىزىلىپ، ساپارىمىز كەيىنگە شەگەرىلدى. ءبىز قۇجاتتارىمىزدى كەرى الماي، شەكارانىڭ اشىلۋىن كۇتتىك. ەگەر ءبىز باعدارلاماعا قاتىسۋدان ءوز ەركىمىزبەن باس تارتساق، كومپانيا 785 دوللارعا دەيىن ۇستاپ قالاتىنىن مالىمدەدى. ءبىراق ونىڭ بىزگە ءتيىمسىز ەكەنىن ايتىپ، سوڭىنا دەيىن كۇتۋگە كوندىردى. وسىلايشا كەشەگە دەيىن كۇتتىك. 22 ماۋسىمدا باعدارلامانىڭ بولمايتىنىن حابارلادى. سوزدەرىنشە، ترامپ ەشقانداي ۆيزاعا رۇقسات بەرمەي جاتىر ەكەن. جەكە ءوزىم كومپانياعا 800 مىڭ تەڭگەگە جۋىق اقشا بەردىم. ەندى اگەنتتىك سول "800 مىڭنىڭ 200 000 مىڭ تەڭگەسىن عانا قايتارامىز" دەيدى. وسىلايشا ولار ءار ستۋدەنتتەن 600 مىڭ تەڭگەدەن ۇستاپ قالماقشى. وسى قىزمەتتى ۇسىناتىن باسقا اگەنتتىكتەر سالىنعان اقشانى ءادىل قايتارىپ جاتىر. ال بىزگە "200 مىڭ تەڭگەنى قايتارىپ الا الاسىزدار" دەپ بۇگىن عانا شەشىم كورسەتىلگەن حات جىبەرىپ وتىر. ءبىز بۇعان كەلىسپەيمىز، – دەيدى ايجان ءابجان قىزى.
قامشى ءتىلشىسى Corvette Center كومپانياسىنىڭ الەۋمەتتىك جەلىلەردەگى پاراقشاسىندا جازىلعان تەلەفوندارعا حابارلاسقانىندا، تۇتقانى ەشكىم كوتەرمەدى.
پىكىر قالدىرۋ